أسباب تعينك على عدم ترك الصلاة
طبعا الاسباب اللى ذكرتها فوق دى لوحدها تكفى وتكفى تماما
وإن مأثرتش فيك اخاف ان بقية الاسباب متأثرش فيك
بعد ذكر كل ما سبق
لازم تعرف عظم قدر الصلاة ربنا عز وجل
ومش هتكلم واقول كل شئ
بس هتكلم فى اللى يحرك اى حد فينا
اول شئ ان تارك الصلاة متعمد كافر بنص الحديث اللى كلنا عارفينه
هتقولى انا متكاسل هقولك المتكاسل يستتاب 3 ايام وان لم يفعل يقتل حدا
متخيل؟ يعنى عقوبتها فى الناحيتين ايه؟
طب وبعدين؟
مفيش بعدين تخيل دلوقتى إنت عرفت انك هتموت كمان ساعتين
إيه اول أمنية هتتمناها؟
هتتمنى ربنا يمد فى عمرك عشان تصلى وتصوم وتطيعه
صح؟
طب على فكرة انت اساسا ممكن تموت قبل اما تكمل قراية الموضوع
ليه دايما متفكرش انك ممكن تنام متصحاش
طب انا هموت بكرة وعرفت انى هموت بكرة
يبقى هصلى النهاردة
وكل يوم تفكر بنفس الطريقة
ومتسيبش الشيطان يقولك ياعم انت صحتك بمب ياعم انت مش هتموت دلوقتى لسة شباب
كان شاب عنده 20 سنة وصحته بمب ماشى فى الشارع عادى
وعلى جنب وهوبا سواق متهور خبطه بعربية من ضهره مات فى لحظتها
ملحقش حتى يتوب ويصلى
كان رايح جامعته وراكب الميكروباص وهوبا الميكروباص وقع من فوق الكوبرى مات
مش بالصحة؟ مش بالسن
ده قدر ربنا
اخويا الله يرحمه
زينا كده كان بيخس لكن مش حاسس بتعب بس بيخس
شهر 2 3 4 بيخس صحيح جسمه حلو بس بيخس
وكل اللى حواليه قالوله كده قالك اما اروح لدكتور اشوف ايه الحكاية
راح هوبا لقى عنده سرطان
عارفين؟
فى مرحلته الاخيرة
ومكنش حاسس بتعب ولا حاجة ولسة شباب زينا
ولما دخل المستشفى كان مستنى اما ييجى دوره عامل زى ما يكون محكوم عليه بالاعدام
ومستنى تنفيذ الحكم خلاص
ياترى بقى فين صحته يلحق يصلى يصوم يعوض اى حاجة من اللى فاتت
مفيش
يارب يرحمه ويسكنه فسيح جناته يارب
ويصبرنى على فراقه
المهم اعتقد كده عندك من الاسباب ما يكفى ليعينك على انك تصلى
طب ايه تانى ممكن يعينك على الصلاة؟
انك تعرف ان الصلاة دى اساسا هدية من ربنا ليك قبل اما تكون فرض عليك
راجع الجزء الاول كده وشوف كمية الادعية اللى بتدعيها لنفسك؟
سواء فى الفاتحة او فى السجود او التشهد
ادعية بالرحمة والمغفرة والرزق والنجاة من عذاب القبروالنجاة من جهنم غير اللى بتدعى بيه لنفسك
حاجة كمان تأكدلك انها هدية
قرائتك للاذكار بعد كل صلاة بتغفرلك ذنوبك كلها تخيل عندك ثوب متسخ بتغسله 5 مرات يوميا هتلاقى فيه أى اتساخ؟
انت بتنقى ذنوبك 5 مرات يوميا
تخيل انك تبقى ماشى بعد كل صلاة حاسس ان مفيش حاجة منعاك من الجنة غير انك تموت لما تقرا اية الكرسى ورا كل صلاة
اعرف ان الصلاة هدية ليك وربنا شرعها لافادتك
بخلاف النظافة العامة بسبب الوضوء وبخلاف ما ذكرناه كفاية ان بقينا فى عصر محدش بيذكر فيه ربنا الا فى الصلاة
يعنى دى الحاجة اللى بتذكر فيها ربنا على اقل ما نتخيل
حتى دى نكسل فيها؟
تعالوا بقى نعمل حل عملى بقى للى ممكن يكسل ومحتاج لحلول عملية
اول حاجة دور فى النت على مواضيع بتوصف حب الله لينا عامل ازاى
صدقنى كل اما نحس ان ربنا بيحبنا ازاى كل ما هنصلى واحنا مش حاسين إن الصلاة تقيلة علينا
الحاجة التانية العقوبة المادية
بص انت عندك شهريا 150 فرض تقريبا
هدى مثال وانت طبق بالمبلغ اللى يتعبك
هجيب حصالة وعلى كل فرض يضيع منى احط فى الحصالة مثلا مبلغ ثابت ليكن 4 جنيه
وكل فرض يضيع هعمل كده وياريت تحط مبلغ يكون كبير وغالى عليك
عشان تحافظ على الصلاة
هتيجى اخر الشهر لنفرض انت فوتت 100 فرض يعنى معاك 400 جنيه فى الحصالة
هتعمل ايه؟
هتقسم المبلغ نصين النص الاولانى هتطلعه صدقة وادعى وانت بتطلعه قول يارب انا بعمل اللى بعمله عشان نفسى التزم فى صلاتى يارب ساعدنى ولا تتركنى فريسة للشيطان
المبلغ اللى طالع صدقة مش هينفع تاخده ده اجبارى هيطلع صدقة وده عشان تحاول تحافظ على صلاتك تانى
طب النص التانى؟
هتصلى صلاوات تطوع قيام ليل سنن نوافل اللى تصليه المهم قصاد كل ركعتين تصليهم هتاخد جنيه
هتقولى ليه جنيه
هقولك عشان انت مش هتبقى عارف الفروض اللى فاتتك كام فرض فيهم 4 ركعات وكام فرض ركعتين وكام فرض 3 ركعات فا انت مش عارف عدد الركعات المطلوبة منك ايه
وبالتالى الاحوط انك هتصلى 200 صلاة تطوع عشان تاخد الفلوس
طب مصلتهومش؟ الفلوس هتطلع صدقة مش هتاخدهم فى جيبك برضه
عشان متضيعش فروض تانى
ومرة فى التانية فى التالتة ربنا هيصلحلك الحال لانك هتبقى جاد تماما فى التوبة
فى طبعا حاجات تانية
بس كفاية عليكم دول ومتنسوش تدعولى بالدعاء اللى ذكرته فوق
وربنا يصلحلكم الحال
اتمنى اكون قدرت بجد افيد بشئ
وأسف إن كنت طولت عليكم
لكن ده من حبى لكم
وجزاكم الله خيرا
hassan zain
الثلاثاء مايو 12, 2015 5:42 pm
