وقبل اما تقول الموضوع طويل فى القراية متنساش انى تعبت اكتر منك وانا بكتبه عشان انت تستفاد وانا مش مجبر على فكرة اكتبهولك انا مش هستفيد منك بربع جنيه حتى بس كتبته عشان حاسس بيك وتعبت زيك فى الاول
وعشان تعرفو ان الموضوع دا مش باصص من وراه بمصلحة نهائى مش هتلاقوا لا ليا ارقام تليفونات ولا رابط الصفحة الخاصة بيا ولا رابط الجروب الخاص بيا
لانه خالص عشانكم مش اكتر فا محدش يزهق من الرغى اللى فى الموضوع
السؤال دا موجه لاصحاب الشبكات واللى واخدين وصلة من صاحب الشبكة
بس قبل الاجابة لازم تقروا الموضوع عشان تعرفوا تردوا على السؤال
اولا هى الشبكات بتكسب كام
لو جيت سالت 10 اصحاب شبكات بتكسب كام من الشبكة ال 10 بلا استثناء هيقولولك لو كسبنا 300 جنيه يبقى انا حظى من السما
مبلغ قليل مش كدا
طب لو سالتهم الناس راضية عن الخدمة هيقولولك لاء
طب الخدمة مستقرة عندك هيقولولك الى حد ما بنسبة 80%
طب شايف المكسب مرضى بالنسبة لمجهودك؟ ال 10 هيقولوا لاء
طب كام واحد انت مديله نت رخيص ب 20 جنيه وسابك وراح اشترك فى الشركة ب 95 جنيه؟ هتلاقى ال 10 بيجاوبوا فى حدود 2 او 3
طب كام واحد رضى بالنت القليل ورضى يشتغل نت من الفلاشة كمية جيجا ب 25 جنيه؟
تقريبا برضه فى حدود 3
طل مين حصل عنده الكلام دا؟
كل اصحاب الشبكات حصل عندهم الكلام دا
طب ايه رأيك فى اللى بيعمل مشروع شبكة نت هل هى مشروع ناجح ولا فاشل؟
ال 10 مشتركين هيقولوا فاشل
طب انا هثبتلكوا انه مشروع ناجح تماما بس احنا اللى فاشلين وبنتعامل بمنظمة غلط
زى ما شركات النت بالظبط بتتعامل معانا بمنظومة غلط
عمرك حسبت المشتركين اللى خرجوا منك باللى موجودين معاك دلوقتى لو جمعتهم يطلعوا كام مشترك تقريبا
طب هوريكوا صورة لعدد مشتركين شبكة نت الناس اللى خرجت منها بالموجودين حاليا
هتلاقوا العدد مكتوب فى الصورة على الشمال تحت
128 مشترك وعشان اكون منصف فى حوالى 6 مبيدفعوش هنقول 8
120 مشترك فى متوسط 25 جنيه 3000 جنيه
هقولك ياسيدى بافتراض اسوأ اسوأ الاحوال كل 20 مشترك خط 2 ميجا يعنى هيبقى مركب 6 خطوط هيبقى كسبان 1500 جنيه شهريا
انتوا عارفين صاحب الشبكة دا مكسبه فى الشهر من 200 ل 300 كحد اقصى
عارفين ليه عشان سياستنا الغلط كأصحاب شبكات
طب ازاى بيكسب كدا
ماهو ياخفيف منك له بسبب سوء الخدمة اللى شغالين حاليا معاه ميعدوش ال 20 مشترك
والباقى دا بقى كان عبارة عن تبديلات ناس بتدخل وناس بتخرج وناس غيرها بتدخل وناس غيرها بتخرج يعنى الشبكة شهريا مبتزدش عن 25 مشترك والباقيين دول عبارة عن المشتركين اللى دخلوا وخرجوا فى فترة زمنية مقادرها سنة واحدة فقط
ها مشروع النت ناجح ولا فاشل؟
طب ايه رأيك فى سياسة الاستخدام العادل هيقولولك هو احنا ناقصين الشركات كمان؟
طب تعالوا نسأل اللى واخدين وصلات انتوا واخدين وصلات نت ليه هيقولك عشان سعر الخطوط غالى فى الشركات
طب راضى عن النت اللى بيجيلك؟ لاء زى الزفت
طب لما بتيجى تفتح النت بتستغرب لما بتلاقيه شغال مش مقطوع ولا بتستغرب لما تلاقيه مقطوع مش شغال؟
طب بلاش دى طب ايه رأيك لو تاخد نت من الشركة بنص الثمن يعنى مثلا ال 512 هتاخدها ب 50 جنيه؟ وعلى طول مش فترة مؤقته؟ هيقولك ياااااااه دنا هاخد نت من الشركة على طول
طب ايه رأيكم انا هشرحلكم تجربة حية حصلت فعليا وناجحة
لحل مشاكل الاستخدام العادل وحل مشاكلنا وحل مشاكل الناس اللى بتشترك منكوا
ومش بس كدا وكمان دخلك تقدر تخلى متوصطه 1500 جنيه كحد ادنى
الموضوع طويل بس لما نجح على الواقع حبيت انقلهولكوا يمكن حد ينجح فيه زيى
وقبل اما ابدأ فيه مش حابب حد يستعجل فى القراية فى كلام هيبان منه انى بقول حاجة هيبقى عقلك متبرمج عليها وانا هقول حاجة تانية انت متعرفهاش
واحدة واحدة يمكن تستفيد مش هتخسر غير شوية وقت لو معجبكش الموضوع وياريت محدش يقول كلام فاشل كلام بتاع لا الكلام دا ناجح تماما معايا الحمد لله
ممكن مينفعش معاك بس هينفع مع غيرك
بسم الله نبدأ
نبدأ بالحسابات على السريع كدا وبكلام مختصر مش هشرحه
انت بتجيب الخط مثلا 2 ميجا
لو عاوز النت مظبوط قوى مش هتزود عن 10 مشتركين يعنى 11 او 12 اخرك
طب زودت ل 15 او 16 هيتقل شوية
طب بقيت 20 مشترك هيبقى تقيل وسئ
طب هنفرض انك عاوز تكسب من الخط
على الاقل عاوز 20 مشترك قولى ليه؟
اولا انت بتطلع الاشتراك متوسطه 25 انا بقول متوسط عشان فى ناس بتديها ب 30 وناس ب 20 انا حطيت وسط
يعنى لو طلعت ل 20 واحد يبقى انت داخلك 250 جنيه
هتخصم 220 جنيه للشركة
هتخصم حوالى 50 جنيه تكاليف شهرية
يبقى انت كسبان 225 جنيه دا غير ان عندك كمان فوق ال 20 حوالى 2 او 3 مطلعلهم نت ببلاش قرايبك اخواتك حد حاطط عنده سوتش كدا يعنى
يعنى هيطلع عينك طول الشهر عشان مبلغ تافه جدا
مش بس كدا
دا المشترك عايز منك سرعة 512 صافية والنت ميتقلش نهائى ويفحت داونلوود ويوتيوب طول الشهر براحته بالاشتراك ده
ولو النت قطع ساعتين سعرهم 10 قروش هيطلع سلسفيلك عشانهم؟
مش الكلام دا بيحصل؟
طب ولو المشترك زهق منك بيروح يشترك ب 95 جنيه من الشركة يعنى بيدفع اكتر بس مش ليك لاء للشركة صح ولا لاء
طب طالما هو كدا كدا عنده استعداد يدفع ليه
طب ليه متخليهوش يدفع ليك؟ دا هنشرحه بعدين هيكون ازاى
طب ايه رأيك انت تشتغل بنظام الشركات بس قبل اما تفهم ازاى لازم تعرف ان دا هيبقى مشروعك لازم تهتم بيه لازم النت ميفصلش غير يوم واحد فى الشهر على اقصى تقدير يوم ونص
لازم المشترك وهو بيفتح لو ملاقاش نت يقول غريبة ازاى مفيش نت اكيد فى حاجة مش طبيعية
تعالوا هقولكم الاول ازاى تستفيدوا من نظام الاستخدام العادل
وبعدين ازاى تشتغلوا بنظام الشركات
وبعدين ازاى تخلى النت عندك ميقطعش
نبدأ على بركة الله
ازاى تستفيد من نظام الاستخدام العادل وتحسن النت بتاعك والمشترك كمان يرضى بالىل هتعمله
انا هحط صورة لجدول اشتراكات انا عملته وكانت نتيجته ايجابية بنسبة 100%
وقبل اما تستعجل وتحكم شوف التجربة جات ازاى وكمل قراية متستعجلش الموضوع دا
عشانك انت انا مش هاخد منك فلوس
النظام دا انا عملته فى الشبكة ومشيت عليه ايه اللى حصل
لفيت على كل مشترك فى بيته واديته مستند نصى
اول ورقتين شروط الاشتراك فى الخدمة
تالت ورقة خدماتنا يعنى الصيانة المبيعات الذى منه
رابع ورقة الاسعار
خامس ورقة عملتها مكتوب فيها النص دا
=============
[size=41]اللى يهمك السعر الرخيص ولا الخدمة؟[/size]
[size=41]يهمك نت شغال طول الشهر مبيقطعش نهائى ولا يهمك يكون رخيص ومش مشكلة لو فتحت كام مرة لقيته قاطع؟[/size]
[size=41]يهمك النت مظبوط طول الشهر وميبقاش بطئ ولا يهمك يكون رخيص ومش مشكلة لما الاقيه بطئ؟[/size]
[size=41]انت لوحدك اللى تحدد الخدمة اللى داخلالك عايزها ايه؟[/size]
[size=41]لو يهمك السعر الرخيص قولنا واحنا هنوديك لاى صاحب شبكة جنبك بسعر ارخص مننا بكتير لان معندناش غير نت مظبوط وبس[/size]
[size=41]لو يهمك الخدمة تبقى زى الشركات بالظبط يبقى متتكلمش فى السعر وخليك معانا[/size]
=============================
ولفيت على كل مشترك قعدت معاه والله حضرتك انت عارف ان الخطوط بقت محدودة الاستخدام وكمياتها قلت يقولى اه عارف اقوله طب حضرتك انا عملت نظام جديد تماما فى الشبكة يضمن لك جودة الخدمة وعشان متفتكرش ان الاسعار غليت لاء متقلقش انت بتدفع 25 جنيه لاء انا عملت انظمة من 15 جنيه لغاية 50
جميل؟
هيقولك ليه طب انا مبقعدش نت ولا بستهلك
هترد بكل بساطة بص حضرتك انت مبتستهلكش وانا عارف انك مبتستهلكش بتثبته طبعا
فى ناس فى الشبكة عملت الانظمة دى بسببهم عايزين يدفعوا اقل اشتراك ويفحتوا نت ليل نهار وشوية كلام من بتوعنا دول جميل
وبكل بساطة تقوله انا مش عايز اظلم حد وعايز كل واحد ياخد حقه انا فى واحد عندى مديله باشتراك ب 15 جنيه وانت واخد ب 25 جنيه كدا حاسس انى ظالمك صح؟
هيقولك اه قوله لاء
اللى انا مديله ب 15 جنيه دا اخره بيقعد ربع ساعة نت يوميا شغل فا استخدامه فى الشهر كله مبيعديش جيجا ونص فا ليه اظلمه واخليه يدفع فلوس مش هيشتغل بيها
فا بقوله لاء ادفع اشتراك اقل قصاد الشغل البسيط اللى بتشتغله فى حين لو فى واحد تانى بيشتغل معقول مطلعله ب 25 واحد محتاج سرعة عالية شوية بس بيشتغل معقول برضه فى نظام ب 30 واحد بقى بيفحت دا ب 50
انتوا بقى فاهمين وعارفين بتتكلموا ازاى مع المشتركين
وبعدين هتقولهم كدا كدا النت مبيفصلش نهائى طول الشهر على الخطوط من 25 جنيه لغاية 50 جنيه
ابو 15 بس اللى محدد
طب نتيجة اللى انا عملته دا ايه فى شبكتى؟
اولا اللى كان بيدفع 20 بقى بيدفع 25 جنيه كا بداية لان مفيش نظام ب 20 هو يا 15 يا 25 فا طبعا رفع اشتراكه
تانى حاجة اللى كان بيدفع 25 جنيه لما لقى ان سرعتها 256 فى حين ان ب 30 جنيه فى زيادة فى الكمية والسرعة 512 قالك ادفع ال 5 جنيه الزيادة وابقى سرعة 512
النتيجة التالتة فى ناس كانت قرفت من الشبكات اصلا ومنهم شبكتى راحت مريحة دماغها قالتلى يعنى نظام ابو 50 جنيه دا هيبقى من الاخر؟ طبعا ردى هيبقى من الاخر واشتركوا فى نظام ابو 50
النتيجة الرابعة
عندى فى الشبكة دلوقتى خطين نت كل خط 2 ميجا وعندى 8 مشتركين بيدفعوا 400 جنيه يعنى بيسدولى فلوس الخط الاولانى ونص فلوس الخط التانى الكلام دا وانا دا بالنسبالى تانى شهر اشتغل فيه على النظام دا
طبعا انا دخل معايا 4 الشهر اللى فات بنظام ال 50 ودخل 3 الشهر دا وواحد اول امبارح بقوا 8
النتيجة الخامسة بقيت بلم نفس المكسب بعدد مشتركين اقل والضغط على النت بقى خفيف لان اصحاب الاشتراكات الصغيرة بقى بيستعمل النت بحرص الى حد ما
طبعا المشترك اللى كان بيتكلم وفكها شوية كنت برد اقوله انا جنبى بدل الشبكة 3 ممكن توصل من اى حد منهم لو عاوز سعر رخيص انا عندى مش فارقة معايا الفلوس بس بحب اريح دماغى من شكاوى المشتركين كل شوية النت بيفصل كل شوية النت تقيل والكلام دا
والكلام دا انت عارفه بيحصل فى كل الشبكات بس عندىالحمد لله مفيش الكلام دا وبعدين من الاخر انا مش غالى
الشبكات التانية مدياك نفس سرعتى اللى فى النظام التانى بنفس سعرى انا مديك 256 ب 25 جنيه واصحاب الشبكات التانية نفس النظام بيدوك 256 ب 25 جنيه هما مش ارخص منى
بس انا صريح مع المشتركين عندى على عكس الباقيين محدش منهم هيقولك الكلام اللى بقوله
اه بالمناسبة انا شغال بمعادلة تحديد السرعات على الاشتراكات الل ب 25 وا 15
عشان طول ما هما بيتصفحوا يكون النت تمام معاهم
انا عاملهم سرعة التصفح نفسها 512 والداونلود 256
بالنسبة للاشتراك اللى ب 30 جنيه عامله التصفح بسرعة 1 ميجا والداونلوود بسرعة 512
بالنسبة للاشتراك ال 50 التصفح بسرعة ميجا ونص والداونلود بسرعة 512
صدقونى مفيش مشترك واحد فك منى من بعد النظام الجديد
بالعكس الخدمة بقت تمام جدا جدا والحمد لله
وحطيت تجربتى وشرحى يمكن حد يستفاد منه
معلش طولت عليكوا بس عشان خاطركوا فى الاول والاخر والله
فى الاخر اقولكم سلام عليكم
الجمعة ديسمبر 05, 2014 10:54 am
