شرح

افضل موقع شرح عربى متكامل
 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول الروبوت جالب المواضيع





شاطر | 
 

 ضربة البداية

اذهب الى الأسفل 
كاتب الموضوعرسالة
Admin
Admin


عدد المساهمات : 694
نقاط : 2571
تاريخ التسجيل : 24/10/2011

مُساهمةموضوع: ضربة البداية   السبت يونيو 02, 2018 2:44 am

البوست الاول


ضربة البداية هي اهم واقوي ضربة واعذروني هطول عليكوا واستحملوني اول كام بوست لان كل كلمة فيهم مهمة جدااا

=========

لما تيجي تبني بيت لازم الاول تبني الاعمدة اللي هتشيل البيت ولازم الاعمدة تكون الخامة بتاعتها صح كذلك التزامك ومحاولة تقربك لربنا لازم في الاساس تكون فعلا عايز تقرب لربنا ونيتك من قراءة بوست زي ده انك بتدور بداخله علي حاجة تقربك لربنا غير كده متكملش مش هعرف افيدك بشئ

===========

لو اديتك عربية تمشي بسرعة 200 كم في الساعة وقولتلك امشي بيها وسط طرق زحمة هتمشي علي سرعة كام؟ لو عرفت تجيب ال 20 كم يبقي كتر خيرك لان حواليك عراقيل مباني ناس بتعدي عربيات قدامك اشارات مرور في عراقيل

الطفل الصغير اللي بيتعلم المشي ويقوم ويقع في الاول لو المكان اللي بيتعلم فيه المشي كله عراقيل مش هيعرف يمشي كذلك التزامك لازم عشان تعرف تمشي فيه بوقت اسرع لازم ازالة للعراقيل زي مثلا الصحبة السيئة وهوضحلكم اهمية النقطة دي في بوست منفصل زي مثلا سماعك للاغاني والافلام 

ايه ده ياعم اللي بتقوله ده ؟ طب صلي الاول علي اللي هيشفع فيك

الهدف مش انك تبطل الحاجات دي علي قد من انك توجد وقت اكبر للطاعة بمعني مثلا بتقعد كام ساعة فيس بوك وكام ساعة قرآن؟

كام ساعة قرآن ايه ياعم انا مش فاكر المصحف شكله ايه 

هو ده اللي بتكلم عليه انت يومك مليان معندكش وقت فاضي فا لازم تبقي ناوي انك تشيل اقل الحاجات اهمية في حياتك عشان تدخل مكانها حاجات تانية مهمة تقربك لربنا

متقلقوش هساعدكوا في ده متستعجلوش لانك مش هتلتزم من اول ولا تاني ولا تالت بوست حتي 

اول كام بوست دول تمهيد وتهيئة لك عشان تقدر تقرر بعدها تاخد قرار الالتزام وانت عندك عزيمة

===========

#دعوة_ان_ربنا_يهديني_واعرف_اكمل


البوست الثانى


معرفة العلة

عشان تحل اي مشكلة لازم تعرف سببها وبعدها تشيل السبب المشكلة تتحل كذلك حياتك مش هتكلم عن التزامك هتكلم عن مشاكلك فلوسك مبتقضيش حياتك ما بين ارهاق شغل وفلوس ضايعة وديون ومفيش راحة بال كل اما تحل مشاكلك من ناحية يطلعلك مشاكل جديدة؟ الي اخر المشاكل دية .. طب ما هو المشاكل دي مش من فراغ المشاكل دي ليها اسباب كتيرة جداا لكن نجيب اهمها عشان نقدر نتلافاها

السبب الاول يكمن في هذا الحديث القدسي "يابن ادم تفرغ لعبادتي املأ صدرك غنا وأسد فقرك وأن لم تتفرغ لعبادتي ملأت يدك شغلا ولم أسد فقرك"

احنا مفكرين اننا لو مثلا اشتغلنا بمرتب مثلا خمسين الف جنيه هنعيش مبسوطين مثلا وده غلط السبب في السعادة ارضاء ربك. . ربك هو اللي يمنع عنك الامراض يمنع عنك اذي الناس هو اللي بيبعتلك مرتبك ورزقك هو اللي يريح بالك هو اللي بيشيل عنك المصائب اللي بتنكد عليك السبب الرئيسي فا انك مبترضيش ربك

السبب الثاني : الذنوب والمعاصي تخيل نفسك معاك 2 بتزقوا عربية لقدام هتزقوها صح؟ تخيل جه خمس ست افراد قدام العربية وبدأوا يزقوها لورا؟ طبيعي هيتغلبوا عليكوا اهي العربية دي قربك من ربنا بتصلي بس. . بتصلي وتصوم بس طب قصادها بتسمع اغاني ومسلسلات بتشتم في اصحابك يشتموك بالام بتنم علي ده وبتتكلم علي ده خمستلاف معصية في اليوم مقابل خمس فروض وصيام 

مبقللش من قدر صلاتك وصيامك بس عايز اوريك فعلا سبب اللي انت فيه

الكلام ده مش كلامي الكلام ده كلام حبيبك النبي إن الذنوب تجتمع علي العبد حتي تهلكه "إياكم ومحقرات الذنوب فإنها تجتمع على العبد حتى تهلكه"

دول اكبر واهم سببين لكل اللي انت فيه في حياتك عاوز حياتك تتعدل صلح السببين دول وبالمناسبة

دائما جزاء الطاعة طاعة بعد الطاعة ربنا بيخليك تقربله اكتر لانك بتعمله الحاجة اللي بيحبها

وعقوبة المعصية معصية بعدها

انا مش هتكلم في عقوبات الذنوب لانها كتيرة جداا لكن اهمها طبعا انقطاع الرزق في الدنيا وهتلاقي الادلة اخر البوست والعقوبة الثانية سوء الخاتمة ونعوذ بالله منها

اللي عاوز يعرف عقوباتها عشان تساعده في الاقلاع عنها اما ينتظرني في بوست قريب هذكر بعضها مختصرا او انصحه بالذهاب لليوتيوب وسماع محاضرة عقوبات الذنوب والمعاصي مائة عقوبة

========

الادلة علي ان الرزق يمنع بالذنب

ملاحظة: متعودتش اذكر ادلة لان كتير حفظ الادلة من كتر تمرارها من المشايخ انا ذكرتها في البوست ده بس لان موضوع الرزق والهم مهم عند ناس كتيرة جدا وانا اولكم فذكرتها عشان تبقوا علي يقين بالسبب الحقيقي

الدليل الاول :

قال علي بن أبي طالب - رضي الله عنه - : ما نزل بلاء إلا بذنب ، ولا رفع إلا بتوبة. 

الدليل الثاني: 

قال تعالى : وما أصابكم من مصيبة فبما كسبت أيديكم ويعفو عن كثير [ سورة الشورى : 30 ] .

الدليل الثالث:

وقال تعالى : ذلك بأن الله لم يك مغيرا نعمة أنعمها على قوم حتى يغيروا ما بأنفسهم [ سورة الأنفال : 53 

الدليل الرابع: 

وقال تعالى : إن الله لا يغير ما بقوم حتى يغيروا ما بأنفسهم وإذا أراد الله بقوم سوءا فلا مرد له وما لهم من دونه من وال [ سورة الرعد : 11 ] .


البوست الثالث


عدوك شيطانك

أول وأكبر وأهم عائق فى حياتك هو الشيطان لانك كل اما تزيل عائق من قدامك هيحطلك غيره عاوز تصلى جماعة يقولك طب اقرا اسمع الاول شوية خطب عشان متقطعش فى الصلاة تسمع يقولك طب صلى فى البيت الاول عشان متزهقش تصلى فى البيت يقولك مفيش مانع تاخر صلاتك الوقت معاك مفتوح وهكذا هو الشيطان

مجاش فى بالك فى مرة انك تلتزم وملتزمتش؟

حبيت تقرب من ربنا ومعرفتش

اول لما تبتدى تصلى يومين تلاتة اربعة وتبتدى تكسل وتبطل

ويكونوا حتى ايام تقيلة عليك

طب نفسك فعلا تقرب من ربنا ومش عارف تقرب منه ازاى؟

ماهو ده بسبب انك مش عارف مين عدوك

ومش عارف تتعامل معاه ازاى

تخيل كده انت ماسك موبيل اول مرة

هتعرف تتعامل معاه؟

اهو ده التزامك

انت بتتعامل مع عدو ليك اول مرة

ولإنك مش عارف تتعامل معاه

فا الطبيعى انه يغلبك فى الاول

زى بالظبط لما تكون رايح تحارب واحد متدرب ومعاه كله اسلحته

وانت ممعكش لا سلاح ولا متدرب ولا أى حاجة

تفتكر هتعرف تغلبه؟

لاء طبعا

اهو التزامك ده هو الحرب اللى انت داخل عشان تكسبها وعدوك اللى سلاحه كامل ومتدرب بقاله الاف السنين هو الشيطان باسلحته طبعا.. طب انت لازم تتدرب وتجهز وتعرف تختار السلاح المناسب اللى تغلبه بيه

الشيطان

اكبر واخطر عائق

واول واخطر سلاح فى يد الشيطان هو سلاح اليأس ومن بعده سلاح التجربة

تفتكر سهل على الشيطان يشوفك داخل هنا ويسكت

لاء طبعاااا

كل مرحلة وليها سلاح عند الشيطان

ولإنك لسة متدربتش كويس ومش دارس عدوك

فا أنت الشيطان هيستخدم أول أسلحته ويضحك عليك بسهولة

وسلاح الشيطان فى المرحلة الحالية 

هو

ياعم إلتزام إيه؟

انت هتفضل زى ما انت مش هتتغير

ما انت حاولت كتير قبل كده ومعرفتش

بص انت اللى زيك كده كده داخل النار

تتعب نفسك ليه

والناس هتقول عليك متشدد

تفتكر انت هتبقى صحابى ماشى على الارض

ده انت حيا الله اخرك هتصلى ودمتم ده إن كملت اساسا

عرفتوا السلاح ايه؟

سلاح اليأس

ومش بس كده

ده انت اول لما تفكر تصلى صح

على سبيل المثال

هتلاقى نفسك بتقول لنفسك انا هقول لحد يبقى يخلينى اقوم اصلى يشجعنى 

وفى نفس الوقت الشيطان من جواك

لاء لاء اوعى

ولما تبتدى تكسل تانى 

هتهرب من الشخص ده ازاى عشان متصليش؟

خليها لما تتأكد انك هتصلى

هو ده الشيطان

هو ده اسلوبه

لو معرفش يغلبك بالسلاح الاول

يتنقل للسلاح التانى

سلاح جرب الاول

مشيت كان بها ممشتش يبقى خلاص

والسلاح ده خطير جدااااا

فى فرق بين إنى اكون داخل اجرب

او داخل وانا فى بالى عارف إنى يا قاتل يا مقتول ولازم اخرج قاتل وإلا فا انا موتت

فى الاولى انت عارف انك فى الحالتين هتبقى خارج عايش

مش هتبقى عارف الحقيقة

انك هتبقى موتت فعلا وإنت مش واخد بالك

لكن فى الحالة التانية

انت عرفت انك لو مبذلتش قصارى جهدك

فا انت ميت

طولت عليكوا جداااااااااااا

اشوفكم البوست القادم

فتحت البوستات للعامة لو حد حابب يشير او يفيد جد

متنسوش تدعولى بالهداية

فاصل قصير

دلوقتى مش هنزل البوست الرابع انا اخترت فاصل بسيط قبل اما تكمل

لو انت بتلتزم وبتقع بتصلى وتقطع كمل متقفش

انك تصلى وتقطع احسن من انك تقطع خالص

النهاردة لو بتقطع وبتجاهد نفسك عشان تحاول ترضى ربك مع تعب المجاهدة ربنا هيرضيك وهيجيلك الوقت اللى هتلتزم فيه مش هتقطع

استمر

واقرا مش لازم ليا دور على حد بتحب تقراله او تسمعله واقرا او اسمع

ساعد نفسك 

إستمر

البوست الرابع

البوست اللي فات عرفنا مين عدونا
عرفنا سلاحه اللى بيستخدمه فى المرحلة الحالية
طب من خلال الحلقة اللى فاتت قدرنا نستشف الاسلحة اللى هيستعملها قدام
طب نتدرب بقى عشان نعرف نستعدله
طب إيه الأسلحة اللى هنستخدمها؟
هو سلاح واحد فقط متفرع منه أنواع متعددة من الذخيرة الحية
الثقة بالله
ده سلاحك
إنك تكون واثق فى ربنا إنه استحالة يشوفك بتلجأ إليه 
عشان يحميك من الشيطان ومن شر نفسك
ويسيبك تحارب لوحدك
تثق انه هيكون بجانبك دايما فى المعركة
تخيل صاحبك شايفك بتتخانق 
انت رفيع وعدوك رفيع وصاحبك بسم الله ما شاء الله يفصل منكم ستة
تفتكر هيسيبك تتخانق لوحدك؟
هو أساسا مش محتاج مساعدتك 
كفاية بس عرف انك بتلجأله
وهو هيقوم بالواجب لوحده
ولله المثل الاعلي
ما بالك برب العزة جنبك
بتلجأله 
تفتكر هيسيبك فريسة للشيطان؟
لاء خالص
طب هيساعدك على طول 
لاء طبعا
صحيح ربك كبير بس لازم يمتحنك الاول
لازم يتأكد وهو يعلم مسبقا يتأكد إنك صادق فى اللجوء إليه
يقول الله عز وجل
" احسب الناس أن يتركوا يقولوا أمنا وهم لا يفتنون"
لازم ربنا يختبرك الاول 
لو نجحت وعديت تأكد إنك من الناجيين بإذن الله
ناج لانك بقيت فى حماية ربنا
تفتكر حد يقدر يقربلك ولا الشيطان ذات نفسه لو إنت فى حماية ربنا؟
لاء طبعااااا
بس بشرط
لازم وانت بتقول لاء تكون فعلا واثق فى ربنا
مش مجرد كلام بنقوله وخلاص
أنا واثق ان ربنا مش هيسيبنى لغاية لما يدخلنى جنته
أنا واثق إن ربنا مش هيسيبنى أرجع عن إلتزامى
ماهو انت لازم تثق 
ربنا عز وجل يقول
"أنا عند ظن عبدى بى ، فليظن عبدى ما شاء"
شوف هتظن بربنا إيه
حديث اخر يقول الله تعالى فيه
"من تقرب إلى شبرا تقربت أليه ذراعا ، ومن تقرب إلى ذراعا تقربت إليه باعا ، ومن أتانى يمشى أتيته هرولة"
إبدأ من دلوقتى
البداية عليك انت 
ربنا بيستنى منك البداية وهو هيجيلك جرى
طولت عليكوا 
متنسوش تدعولي بالهداية

وقفة تأمل

يعنى مش حرام عليك تبقى مصمم تعيش حياتك بالحلال ومصمم تعيش فقير فى دنيتك وشايف الضنك كله ومصمم كمان تبقى اقل من الفقر فى الاخرة وتخسر أخرتك؟
ماهو لو بايع دنيتك اشتغل بقى فى مخدرات اثار سلاح يعنى انت مصمم تخسر دنيتك واخرتك؟
طب والله حرام
بس الحرام الاكبر انك تشترى دنيتك وتبيع اخرتك
تأمل فى حالك هتلاقى مكسبك الفعلى الجنة اللى مفيهاش ممات
ولا إيه؟

البوست الخامس

بصوا هو البوست ده كان لازم ييجى متاخر شوية وفى بوستات تانية تسبقه
بس ممكن ننزله دلوقتى قبلهم
وحبيت انزله لانه مهم جدااا فى المرحلة دى
وهتكلم فيه عن حب الله لعباده
انت لو واحد جدع معاك دايما تحب تخدمه
ولله المثل الاعلى لازم تحس قد ايه هو بيحبك عشان تطيعه وانت مبسوط
تحس ان الفروض المفروضة عليك هى من حب الله لك وليس العكس
فى ادلة كتير جدااا احنا عارفينها حتى اللى هتكلم عنه فى البوست ده برضه عارفينه بس انا هقتبس جزء من اهم دليل وهسلط عليه الضوء من زاوية احنا مش شايفينها وهقسم البوست على جزئين
الصلاة
قبل اما ييجى فى بالك ان الصلاة دى مفروضة عليك 5 مرات يوميا وانها تضايقك الى اخر هذه الاشياء تفكر فيها كده شوف هى فرض ولا هدية من ربنا لك
اه هدية تدل على محبته لك تعالى نشوف كده
مثال صغير كده
فى دعاء الاستفتاح الخاص بالصلاة بنقول وركزوا معايا كده "اللهم باعد بينى وبين خطاياى كما باعدت بين المشرق والمغرب، اللهم نقنى من خطاياى كما ينقى الثوب الأبيض من الدنس ، اللهم اغسلنى بالثلج والماء والبرد"خمس مرات يوميا فى متوسط عشرون عاما يعنى دعيته 36500 مرة لو استجاب الله لك مرة منهم تكفى؟
ارجع اقرا الدعاء تانى كده وركز فيه وعلى فكرة العمر انا ذكرته افتراضى كمتوسط ليس الا
بس ركز فى كلمات الدعاء هتلاقيها كلها دعاء ليك
ربنا بيقولك انا عايزك تصلى عشان تدعى لنفسك
عشان متنساش نفسك وسط مشاغل الحياة
طب هقولك إنت ايه مشاكلك فى الحياة؟
رزق صحة سعادة دى اهم مشاكلك صح؟
وفى الاخرة الجنة صح؟
طب بص معايا كده
بين كل سجدتين فى كل ركعة فى دعاء بيتقال فى ناس كتير اول مرة تسمع المعلومة دى لكن فى دعاء بين السجدتين عارفين كلمات الدعاء ده إيه؟
بصوا كده
"أللهم أغفر لى،وأرحمنى،وأجبرنى،وأهدنى،أرزقنى" يعنى ما لا يقل عن خمس مرات يوميا يكفى أن يستجيب الله واحدة لك؟
ربنا يوميا بيخليك 5 مرات تدعى لنفسك بالدعاء ده محتاج ايه تانى
مشاكلك في الدنيا محلولة في الدعاء ده
ولا انت حابب تفضل بمشاكلك زي ما انت؟
ده دليل على محبة الله لك 
ميستاهلش منك إنك تطيعه؟
انت بتنفذ اوامره عشان نفسك 
تنفيذك لاوامره مش هتفيده وعصيانك له مش هيضره
تنفيذك لاوامره هتفيدك انت وعصيانك له هيضرك أنت
سبحانك يارب احنا اللى محتاجينك وبالرغم من ذلك تأمرنا بتنفيذ اوامرك لانك تحبنا 
كفاية طولت عليكم اشوفكم فى الجزء القادم
ممكن تقلبوا البوست يمين او شمال هتشوفوا الاجزاء السابقة
ومتنسوش تدعولى بالهداية

البوست السادس

البوست اللى فات كتبت نبذة مختصرة بتوضح قد ايه ربنا بيحبنا
طبعا فى ادلة تانية بتدل على ان ربنا بيحبنا وفى كتير منها فى الصلاة
لكن هأجل الجزء الخاص بمحبة ربنا لينا للمرة القادمة وهتكلم المرة دى عن إن ليه قلبك مبيتحركش؟ 
واحد يقولى قريت بوستاتك وبرضه قلبى متحركش 
مفيش اى خطوة للأمام
اهو البوست ده للشخص ده
بسم الله نبدأ
================
عمرك شوفت رئة حد بيشرب سجاير بقاله 20 سنة؟
لو بصيت وحطيتها جنب رئة واحد مبيشربش سجاير هتلاقى اللى بيشرب سجاير لون الرئة بتاعته اسود فحم
كذلك قلبك
انت عمال تشغل قلبك بالذنوب وتملاه طول عمرك
طبيعى لما تيجى تغسله وتنضفه تتعب
بس بعد اما ينضف هيبقى مراية
زى لما تسيب اكل ينشف فى طبق مثلا سبته يوم 2 و 3 لما تيجى تغسله هتتعب
وفى نفس الوقت مينفعش تحط فيه اكل نضيف وتاكله الا اما تغسله الاول والا الاكل النضيف هيبقى ردئ
قلبك كذلك متسخ من اثر الذنوب مينفعش تحط فيه حاجة نضيفة وهو ما زال متسخ
طبعا مش محتاج اقول ايه اللى مالى قلبك
بص كده فى حياتك
اغانى افلام معاكسات حتى لو هزار نظرة هنا هزار بشتيمة هنا نميمة هنا 
حياتنا مليانة ذنووووووووووووووووووب
ايوان انا بزعق وانا بقولها فعليا مليانة ذنوب واحنا مش حاسين
وعشان قلبك يبقى مستريح للطاعات كده وبراحته لازم نشيل من جواه الذنوب
وزيد على ده بقى ذنوب الخلوات
ودى كارثة الكوارث
اللى مخلى قلبك ميتحركش ومش عارف تقرب من ربنا ذنوبك واكبرها واخطرها ذنوب الخلوات
ولما تعرف ان ذنوبك هى سبب بعدك عن ربنا يبقى لازم تكرهها
طبعا احنا حافظين حديث ذنوب الخلوات مش محتاج اكرره
لكن نتكلم عملى شوية
اول حاجة لازم تعرفها ان النفس امارة بالسوء ونفسك دى لو مشغلتهاش بالطاعة شغلتك بالمعصية
ومش شرط طاعة على سبيل المثال 
انت لو شغال مثلا بتصلح حاجة هترتكب ذنب؟
طب لو مشغول ومش فاضى دقيقة هتفضى تبص على دى ولا تتفرج على المسلسل ده ولا تقف على ناصية الشارع تعاكس بنات؟
هى دى نفسك لازم تشغلها عشان تبدأ تنقى قلبك من الذنوب اللى بتزيده سواد كل لحظة
مش هقولك اشغله فى قراءة قرأن وتسبيح وذكر وا لا لا مش هطلب منك كده دلوقتى خالص
انت اللى هتوصل للمرحلة دى لوحدك إن شاء الرحمن 
انا هطلب منك انك تدور تشغل نفسك ووقتك فى حاجة بتحبها تكون حلال
على الاقل لو مبتدخلش قلبك اثر حسنات خليه هو يخرج اثر السيئات
نضفه خطوة خطوة عشان يستقبل حب الطاعة على نضافة
مثلا اشغل نفسك بدل ما تتفرج على مسلسلات بالساعات اقعد دور على طرق لحل مشاكلك زيادة دخلك مشاريع على النت برا النت
اشغل قلبك ووقتك بحاجة كويسة
لان الحاجة الكويسة دى هتاكل وقتك من غير ما تحس تيجى بقى ترتكب ذنب او معصية خاصة لو ذنوب خلوات تلاقى الوقت خلص منك معندكش وقت ترتكب فيه المعصية
علاجك فى ايدك انت
عندك وقت فاضى زور حد
اشترك فى صفحات مساعدة الناس فى حل مشاكلهم وشاركهم برأيك
دور على حاجة مهمة على النت تستغلها فى انها تزيد رزقك
كورس او فكرة مشروع او برنامج هادف على اليوتيوب 
او اتفرج على مثلا افلام وثائقية نقى قلبك ونضفه
لو بتشتم بطل لو بتنم على حد بطل لو بتغتاب لو اى حاجة بطل
كل ده عراقيل بتعرقلك ناحية الالتزام
كل ده مانع دخول احساسك بمحبة ربنا لك فى قلبك
كل ده مانع حبك للطاعة
عرفتوا السبب
اتمنى بقى تدعولى بالهداية
ومعلش طولت عليكوا جداا المرة دى اشوفكم البوست القادم إن شاء الرحمن

البوست السابع

المرة اللي فاتت اتكلمت عن ان ليه قلبك مبيتحركش رغم انك عمال تقرا وتسمع وتحاول ومفيش تقدم

وعرفنا السبب الاكبر ايه

لكن فوجئت بعد كتابتي للبوست المرة اللي فاتت انه مكنش كامل كان لازم له جزء ثاني فا هستكمل كلامي في البوست ده كجزء ثاني للبوست السابق وسامحوني البوست المرة دي مش ممتع زي كل مرة لكن مهم

----------------

ذنوب الخلوات

اصعب حاجة بيقابلها الشخص هو ذنوب الخلوات عارفين 

يعني ممكن الانسان يبطل شتيمة عادي يبطل يسمع اغاني عادي لكن ذنوب الخلوات صعبة وصعوبتها للٲسف بتنبع من انها بتبقي ممتعة متعة لحظية

ورغم متعتها الا انها بتضايقنا جدااا

وسبب كبير في ان قلبك مبيتأثرش بكل اللي قريته سواء مني او من غيري

ماهو انت مينفعش تجرب او تضحك علي ربنا

عشان تلتزم لازم فعلا تكون عابز تخلي ربنا رقم 1 في حياتك بالفعل مش بالكلام

لازم فعلا تثبت انك عايز تتوب من الذنب مش مجرد بحاول

المسٲلة مسٲلة مصير 

جاهز ولا لٲ

النبي عليه الصلاة والسلام قال لسيدنا عمر"حتي اكون احب اليك من نفسك" 

كلمة سيف قاطع

ناوي تبطل ولا لأ

اه ولا لٲ وش

اه عايز

طب لو عايز كمل اللي جاي

طبعا مش محتاج افكركوا باللي كتبته في البوست اللي فات ان قلبك طول ما هو متسخ بالذنوب مش هتلاقي فيه مكان فاضي تدخل فيه حلاوة الايمان

لكن البوست ده هكتب فيه شوية طرق عملية اختار منها اللي يناسبك ودي مجرد افكار تخليك تفكر في حاجات تانية تناسبك

اولا لازم تشغل نفسك متسيبلهاش وقت فراغ

ذنوب الخلوات مبتحصلش الا في اوقات الفراغ وبداية الذنب بيبدٲ من المخ من التفكير تبدأ تستدعي افكارك وبعدها تبقي مهيٲ لفعل الذنب بعد الاحساس اللي طلبته نفسيا نتيجة تفكيرك في الذنب

وبالتالي لازم تشغل مخك في حاجة بديلة متديلوش الوقت يفكر في الذنب

مثلا 

وقت فراغك دور انك تعمل حاجة بتستمتع بيها ليكن مثلا زي ما قولت البوست اللي فات اسمع افلام وثائقية اتفرج علي فيديوهات يو تيوب

طب هتقولي ممكن مسلسلات وافلام عادية

اقولك حاليا ممكن تعمل كده في فترتك الاولي بس

تسمع مسلسل ضرره اخف من ضرر ذنوب الخلوات

دي مجرد فكرة حاول تشوف افكار مناسبة ليك ونفذها زي مثلا لقيت نفسك لوحدك اخرج

زيارة حد اتصل بحد افتح عليك باب 

فكر في انك تعمل حاجة تضعف من فرصة وجودك لوحدك وانت فاضي

ثانيا بقي

هتقولي بعمل كل اللي فات وبرضه برجع للذنب

معلش انت زي اللي بيشرب سجاير

لو بطل فجأة صعب يبقي قلل وبعدين بطل

مثلا بدل ما تعمل الذنب يوميا خليه يوم ويوم وبعدين مرتبن اسبوعيا ومرة وهكذا

وانت بتعمل كده انت كده بتفضي قلبك من الاتساخ لازم تدخل قلبك حاجات تانية عشان ميفضلش فاضي تقوم ترجع للذنوب تاني

اقرا كتير عن حب ربنا ليك رحمته بيك فكر بعقلك انت لو موتت النهاردة هتبقي مرتاح في اخرتك؟ حاول تعلي ايمانيتك وتدخلها قلبك مكان الذنب اللي بتخرجه خطوة خطوة

ثالثا: 

افتكر ان كل باب حرام انت فاتحه بتقفل علي نفسك باب حلال مثلا ربنا عمره ما هيبيتك من غير عشا بس لو روحت جبت عشا بفلوس حرام انت خلاص اتعشيت فا منعت عن نفسك رزق حلال لكن منعت عن نفسك الفلوس الحرام ربنا هيفتحلك باب الحلال

كذلك ذنوب الخلوات "من ترك شيئا لله عوضه الله خيرا منه"

هتستغني عن متعة حرام ربنا هيفتحلك باب لنفس المتعة حلال 

رابعا

الدعاء خلي ثقتك بربنا ملهاش حدود ثق انك عمرك ما تدعيله وتتضرع له في الدعاء انه ميسيبكش فريسة للشيطان تاكد انك عليك البداية وربنا هياخد بايدك

تخيل بتطلب مساعدته هيسيبك؟

ٳبدٲ وثق انك هتوصل لنتيجة ممتازة إن شاء الرحمن


السلسلة لم تنتهى بعد انتظروا البقية

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://shar7.arabepro.com
Admin
Admin


عدد المساهمات : 694
نقاط : 2571
تاريخ التسجيل : 24/10/2011

مُساهمةموضوع: رد: ضربة البداية   السبت يونيو 09, 2018 5:10 pm

البوست الثامن




البوستات اللى فاتت كانت بوستات تأهيلية ياجماعة عشان تقدروا تبتدوا مشوار التوبة
اعتقد 7 بوستات كانوا كويسين للتأهيل النفسى عرفنا المشكلة ايه عرفنا سببها ايه عشان نعالجه عرفنا مين عدونا عرفنا الاسلحة اللى هنستخدمها ايه 
طب سريعا كده افكركوا باللى فات قبل اما نخش على الجد
المشكلة عدم الالتزام
سبب المشكلة الشيطان والعراقيل اللى بيحطها قدامنا عشان يعطلنا عن الالتزام
السلاح اللى استعملناه فى محاربة الشيطان كان سلاح الثفة بالله
اتكلمنا عن محبة ربنا لينا وان ازاى الفروض اللى ربنا فرضها علينا هى حبا لينا 
اتكلمنا عن المعاصى وازاى نحاول نتخلص منها
اتكلمنا عن أخطر الذنوب وهى ذنوب الخلوات وقولنا طرق عملية لمحاولة التخلص منها
النهاردة هيكون كلامى عن فرض من اهم الفروض التى فرضت علينا
وهنتكلم عن ان علاج مشاكلنا كلها تقريبا فى الفرض ده
الصلاة
ودى اكبر مشكلة عن ناس كتيرة جدااااا
=============
كتير مننا حاول كتير
نفسه يصلى وفى حاجة منعاه
يسمع الاذان يبقى عاوز يقوم يصلى وميقومش
يا إما كسل او غيره
الواحد فى نفسه يقول انا كوبس
والله العظيم كويس
مش ناقصنى غير انى اصلى بس ومش عارف اصلى
والبنت اليومين دول تقول انا كويسة
بحاول ارضى ربنا على قد اما اقدر
محجبة ملتزمة اخلاقيا تماما ودينيا الى حد كبير جدا
الحاجة اللى نفسى اعملها ومش عارفة اعملها هى انى اصلى
نفسى اقوم اصلى محسش ان الصلاة تقيلة ومش عارفة
اعمل ايه طيب عشان اعرف اصلى
عمرك سألت لنفسك السؤأل دا؟
هتفضل كدا لحد إمتى؟
طب السنوات اللى فاتت دى كلها راحت 
ياترى انت خلاص إخترت مصيرك يبقى كدا؟
طب انت حاسس انك مش مبسوط فى دنيتك
نويت كمان تخسر اخرتك وتبقى خسرت ال2؟
طب لو انت حابب تكسب اخرتك كمل معانا
عشان تصلى لازم تفتكر ان ربنا بيحبك زى ما قولنا قبل كده
وعشان احنا بشر فا دايما لازم نعرف ايه اللى هنستفيده الاول قبل اما نشترى المنتج دى طبيعتنا
هقولك ايه اللى هتستفيده من خلال الكلمات التالية هتتأكد من الاتى
أولا: من حب ربنا ليك ان الصلاة عبارة عن هدية قبل اما تكون فرض
ثانيا: إن رزقك وصحتك وسعادتك فى الصلاة
ولإن احنا بشر دايما بنهمل فى نفسنا فا ربنا فرض علينا الصلاة 5 مرات يوميا عشان ننضف وننقى نفسنا من الذنوب خمس مرات
وعشان كمان مننساش نفسنا فى الدعاء هتدعى لنفسك 5 مرات يوميا
غير إنك بتغسل ذنوبك 5 مرات يوميا انت بتمشى مغفور الذنب كل ساعتين او 3 تقريبا بتمسح ذنوبك بتغسل نفسك من الذنوب
فوق ده كله مفيش حاجة تمنعك من دخول الجنة إلا إنك تموت
تعالوا نشوف الإدلة
عند إفتتاحك للصلاة وقبل قراءة الفاتحة فى اول ركعة انك تدعو وتقول "اللهم باعد بينى وبين خطاياى كما باعدت بين المشرق والمغرب، اللهم نقنى من خطاياى كما ينقى الثوب الأبيض من الدنس ، اللهم اغسلنى بالثلج والماء والبرد" خمس مرات يوميا فى متوسط عشرون عاما يعنى دعيته 36500 مرة لو استجاب الله لك مرة منهم تكفى؟
اقرا الدعاء اللى فات تانى بتمعن كده
===========
هل تعلم إنك تدعوا بين كل سجدتين "أللهم أغفر لى،وأرحمنى،وأجبرنى،وأهدنى،أرزقنى" يعنى ما لا يقل عن خمس مرات يوميا يكفى أن يستجيب الله واحدة لك؟ دعاء بغفران الذنب والرحمة والهداية والرزق
===============
تمعن جيدا فى هذا الدعاء .. هل تعلم إنك تدعو بعد التشهد الأخير فى كل صلاة تقول " اللهم إني أعوذ بك من عذاب القبر،ومن عذاب جهنم،ومن فتنة المحيا والممات ،ومن شر فتنة المسيح الدجال"خمس مرات يوميا فى متوسط عشرون عاما يعنى دعيته 36500 مرة لو استجاب الله لك مرة منهم تكفى؟
================
اقولك حاجة جميلة؟ عايز مفيش حاجة تمنعك من دخول الجنة غير إنك تموت بس؟
خايف تموت تخش النار؟
طب شوف اللى جاى ده
حديث النبى عليه الصلاة والسلام يقول"من قرأ أية الكرسى دبر (بعد) كل صلاة مكتوبة،لم يمنعه من دخول الجنة إلا الموت" اقراها خمس مرات فى اليوم والموت هو الوحيد اللى هيكون مانعك من الجنة
=============
طب اسألكم سؤال ..بعد اللى قرأتوه فوق ده تفتكروا ربنا فرض عليكم الصلاة ليه؟
اعتقد الاجابة واضحة زى الشمس 
حب ربنا لكم
الله يحبك يهتم بك يريدك نقيا يريدك تدخل الجنة يخاف عليك من دخول النار
طب بصوا اللى جاى ده
ٳيه رأيك انك تمشى على الأرض وإنت معندكش ذنب واحد؟
تبقى حاسس انك لو توفاك الله هتدخل الجنة؟
يقول صلى الله عليه وسلم."من سبح الله دبر كل صلاة ثلاث وثلاثين، وحمد الله ثلاثاً وثلاثين، وكبَّر الله ثلاثاً وثلاثين، ثم قال تمام المئة لا إله إلا الله وحده لا شريك له، له الملك وله الحمد وهو على كل شئ قدير، غُفرت له ذنوبه وإن كانت مثل زبد البحر"
البعض يتملكه اليأس فقد فاتنى عشر سنوات لم اكن اصلى بها كيف اصلى هذه الصلوات ستأتى منقوصة يوم القيامة وده بيكون سبب فى انهم يكسلوا يصلوا


اسمحولى الاجابة على السؤال ده فى البوست القادم وسيتبين من خلاله ايضا ان كيف ان ربنا يحبنا حتى لو لم نصل 50 عاما وليس 10 فقط




البوست التاسع




طب ياجماعة
إحنا فى البوست اللى فات اتكلمنا عن الصلاة وإن إزاى احنا اللى محتاجين لللصلاة
النهاهاردة البوست هيكون إجابة على السؤال اللى سبته فى اخر البوست واللى بسببه ناس كتير بتكسل تصلى الا وهو
انا مصلتش 10 سنين او 20 هعوضهم ازاى 
كده كده مش هعرف اعوضهم اوعوا تخلى الشيطان يدخلكم من المدخل ده ويخليكم تيأسوا
اوعوا
طب بصوا انا هنا مش جاى افتيكم فتوى ولا هجيبلكم فتاوى علماء
انا هنا جاى اكلمكم فى زاوية تانية خالص 
رحمة ربنا
قبل اى شئ لازم تعرف اننا داخلين الجنة برحمته قبل اى شئ طبقا لحديث النبى عليه الصلاة والسلام 
تعالوا نشوف
كلنا يعلم قصة قاتل المائة نفس مش محتاج اكررها لكن الفائدة منها ايه هذا العبد قتل مائة نفس لم يعمل خير في حياته قط وفجأة تاب ماذا بعد ان تاب؟ لم يسجد لله سجدة إنما إنطلق الى ارض قوم يعبدون الله لكى يعبد الله معهم فيموت فى الطريق
وعلى الرغم من ذلك من رحمة ربنا له كان من أهل الجنة
فقط لإنه كان صادق فى التوبة
خدوا بالكم من جملة صادق فى التوبة مقالش هجرب وخلاص
قرر يتوب فعلا وتاب
فقط لأن رحمة ربنا وسعت كل شئ
فقط هذا هو ربك الذى يحبك ليه تقصر معاه
ايضا تعلمون حديث النبى عليه الصلاة والسلام حول رحمة ربنا عن انه ارحم بنا من رحمة الام برضيعها لا تلقيه فى النار
عمركم شوفتوا ام ترمى ابنها فى النار؟
ربنا ارحم بها؟
مش عايز يرميك فى الناس
كل اللى طالبه منك توبة صادقة
وفبل اما اقول توبة صادقة اقولك وكمان متأخرهاش
بصوا كده فى اللفظ اللى جاى لما اتجه قاتل المائة الى ارض اناس يعبدون الله ليعبد الله معهم
انظروا ماذا حدث
اتاه ملك الموت وقبض روحه اخصتم فيه ملائكة الرحمة وملائكة العذاب فلما قاسوا المسافة بينه وبين الارضين وجدوه اقرب الى الارض الصالحة بشبر
(شبر)
يعنى بمقدار نفس واحد
لو كان تأخر عن التوبة نفس واحد لكان من اهل النار
سارع دلوقتى محدش يعرف ممكن ننام منصحاش والله اعلم
فائدة اخرى فى حديث قاتل المائة قبل اما اختم بوست النهاردة
الالم نصح العابد انه يتجه للقوم الصالحين ليعبد الله معهم
وجود ناس حواليك مبيصلوش حياتهم كلها شتيمة نميمة معاكسة الى اخر هذه الاشياء بيئة غير صالحة انها تساعدك على انك تفضل ملتزم بالتوبة
عشان تقدر تكمل دور على ناس يشجعوك ينافسوك فى القرب من ربنا
وابعد عن اى حاجة تبعدك عن ربنا 
الناس القريبة من ربنا دعم 
هتشوف ده بيصلى هتصلى هتشوف ده بيقول صلى على النبى هتصلى عليه هتشوف ده بيذكر ربنا هيخليك تذكر ربنا
فا اتمنى تقدروا تجمعوا صحبة صالحة تساعدكم على التوبة
وفى الاخير اقول نفس اللى بقوله كل مرة 
متنسوش تدعولى بحسن الخاتمة




البوست العاشر



فى الجزء ده هتكلم كلمتين صغيرين

ممكن تكون قريت كل اللى فات

ومقتنع بكل حاجة فيه

بس برضه مش عارف تتحرك

مش متشجع

طب اسأل نفسك طب وبعدين؟

خلاص اهيأ نفسى ادخل النار؟

طب جرب كده تمسك عود كبريت مولع لنص دقيقة كده هتستحمل؟

طب إيه؟ وبعدين؟

متكاسل برضه غصب عنك

حاسس انك مش هتقدر تواظب؟

او لسة تقيلة؟

هقولك كلمتين يحاولوا يساعدوك

انت اخرك فى الدنيا هتعيش قد ايه؟

10-15 سنة ممكن اقل؟

ممكن تنام بالليل متصحاش

طب جرب كل يوم بالليل كده وانت داخل تنام فكر انك ممكن تنام متصحاش

صدقنى مش هتعرف تنام بعد كده كل يوم الا وانت خايف انك متصحاش

طب اقولك حاجة

انت مستمتع فى حياتك؟

معندكش مشاكل ومعاك فلوس وكل اللى نفسك فيه معاك والدنيا بيس؟

طب لو مش كل اللى فات ده ليه بقى تضيع استمتاعك بالاخرة؟

تخيل كده لو تعبت 10 او 15 سنة وتوفاك الله

لقيت نفسك فى الجنة بكل حاجة حلوة فيها

هتفتكر تعبك فى الدنيا؟

هتفتكر انك كان نفسك تتجوز فلانة ومرضيتش هتفتكرى ان كان نفسك فى الفلوس الفلانية وربنا مكتبهاش من نصيبك؟

كل ده ولا يسوى لحظة فرحتك وانت داخل الجنة

اعظم فرحة ممكن تتخيلها فى الدنيا ايه؟

اقل من فرحتك بدخولك الجنة ونجاتك من عذاب النار اللى هتحرق كل جزء فى جسمك

حاول تعقل وحاولى تعقلى كده

وتوكلوا على الله من دلوقتى

احنا مظلومين وحقنا مهضوم فى الدنيا بلاش كمان نضيع اخرتنا

على حاجة مش هتكلفنا ساعة يوميا

ادعولى بحسن الخاتمة

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://shar7.arabepro.com
 
ضربة البداية
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شرح :: القسم العام :: الاسلاميات-
انتقل الى: