شرح
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

شرح

افضل موقع شرح عربى متكامل
 
الرئيسيةالبوابةأحدث الصورالتسجيلدخول الروبوت جالب المواضيع





 

 ازاى تكبر فى البلد دى

اذهب الى الأسفل 
كاتب الموضوعرسالة
Admin
Admin



عدد المساهمات : 744
نقاط : 2721
تاريخ التسجيل : 24/10/2011

ازاى تكبر فى البلد دى Empty
مُساهمةموضوع: ازاى تكبر فى البلد دى   ازاى تكبر فى البلد دى I_icon_minitimeالسبت نوفمبر 22, 2014 4:04 pm

فى نهاية صيف 2012
مكنتش شغال كنت تقريبا مقيم فى البيت بصفة شبه مستمرة
لغاية لما جالى واحد صاحبى كان مأجر محل بقاله 3 شهور وقافله بسبب انشغاله فى شغل تانى
ولانه كان عارف خبرتى فى مجال الكمبيوتر والشبكات فا جالى وكلمنى انى انزل معاه فى المحل نفتحه كمبيوتر ونت
طب هنحط ايه فى المحل
قالى المكتب بتاعك وجهاز الكمبيوتر بتاعى ونبدأ من هنا
وقد كان ودى كانت البداية بس مكنتش النهاية
عايزين تعرفوا النهاية
يبقى نقول بسم الله
==============
كتير من شبابنا اللى على النت وبرا النت نفسهم اما يشتغلوا شغلانة محترمة بمرتب مجزى ومتكونش واخدة اليوم كله
او انهم يفتحوا مشاريع تدر عليهم دخل مناسب يعيشهم الى حد ما حياة معقولة مش كريمة لان كريمة بتاعة مصر ماتت من زمان
فى الموضوع دا هنتكلم فى البندين
البند الاول شوية نصائح صغيرة للتغلب على مشكلة تنفيذ البند الاول
البند التانى هنتكلم فيه باستفاضة لان دا اساس موضوعنا
وقبل اما نسرد الفهرس حابب اوضح ان اى تقصير فى اى نصيحة وعدم الاهتمام بيها هيكون نتيجته حسارتك وحدك 
انت الوحيد اللى خسران
وهيكون الفهرس كالتالى
نصائح للى نفسهم يشتغلوا شغل محترم فى شركات او للسفر برا او وظيفة حكومية
نصائح للى نفسهم يفتحوا مشاريع 
مشاريع ب 1000 جنيه


جاهزين 
نبدأ
الرجوع الى أعلى الصفحة اذهب الى الأسفل
https://shar7.arabepro.com
Admin
Admin



عدد المساهمات : 744
نقاط : 2721
تاريخ التسجيل : 24/10/2011

ازاى تكبر فى البلد دى Empty
مُساهمةموضوع: رد: ازاى تكبر فى البلد دى   ازاى تكبر فى البلد دى I_icon_minitimeالسبت نوفمبر 22, 2014 4:30 pm

الجزء الاول


قبل اما تبص على الموضوع وتقول طويل وانت هتقراه افتكر ان اللى كتبه تعب فيه اكتر من تعب قرايتك فيه ويمكن تخسر كتير جدا فى حياتك لو مقريتهوش 
وعموما انا كتبته لنفسى وللتذكرة برضه عشان ارجعله فى كل مرة اخد فيها قرار للتذكرة قبل اى شئ وبنشره للافادة وانا المستفيد الاول


اولا للطلبة اللى منتشرين على النت وحلمهم انهم يكونوا حاجة كبيرة ويكبروا لما يخلصوا دراسة فى البلد دية
شوية نصائح 
لازم تعرف ان دراستك اللى انت بتدرسها على مدار حياتك دى كلها هتترمى وراك لان فى بلدك دراستك ملهاش اى قيمة
الا اذا كانت دراستك مدعمة بشهادات خبرة او شهادات دراسة جانبية زى دراسة لغات دراسة حاسب الى الى اخر هذه المجالات
حتى الوظيفة الحكومية فى البلد دلوقتى بقت بتطلب دراسة منحة ال icdl يعنى دراستك لوحدها مش كفاية
بالتالى لازم تفكر صح
واول التفكير الصح انت عاوز تبقى ايه لما تكبر
ومتفكرش انك هتعيش حياتك كلها فى راحة انت مجرد ما هتتخرج صدقنى هتصدم بالمشاكل اللى هتواجهك واللى حلها الوحيد هى الشغل والتعب
ربنا قال فى كتابه العزيز
"ولقد خلقنا الانسان فى كبد"
ولو فكرت فى غير كدا اعرف ان عمرك هيضيع منك من غير ما تحس
ومن هنا فكر ناوى على ايه
ناوى تتوظف؟
ناوى تشتغل فى شركة محترمة؟
ناوى تسافر وتشتغل برا
ناوى تفتح مشروع؟
ناوى على ايه
وبناءا على تفكيرك وتحديد هدفك حدد طريقك
وفى العموم هديك شوية حاجات صغيرة عامة تصلح فى جميع الاحوال
اولها
النت غير مربح على الاطلاق
وحبيت ابدأ بالنت لان معظم الشباب الصغيرين مولعين بالجلوس على الانترنت فلازم اوضح ان النت عمره ما كان مربح ولا عمره هيكون مربح فى مصر على الاقل
لان ثقافة البيع والشراء والمعاملات التجارية على الانترنت فى مصر لم تنتشر بعد كما هى بالخارج
وايضا غير محمية بقوانين وخلافه وبالتالى سهولة النصب من خلال الانترنت كسهولة شرب الماء
عشان كدا اول حاجة تفكر فيها متفكرش تكسب من خلال النت لا بقى من خلال مواقع ربحية اخرى ولا من من خلال موقع انت عامله بنفسك
اعرف واحد كان عامل حساب فى جوجل وكسب من وراه 200 دولار والحساب كان شغال معاه لو كمل بس هو قال هقبض الفلوس واى فلوس تانية تيجى اقبضها
قبض الفلوس من هنا وبعدها حصل موضوع الفيلم المسئ للرسول والدعوات اللى حصلت فى مصر لعدم التعامل مع موقع جوجل ويوتيوب بعدها مباشرة شركة جوجل قفلت حسابه ومعظم حسابات المصريين
لو مكنش قبض ال 200 دولار كان الحساب هيتقفل عليهم
لان من شروط شركة جوجل انها لو قفلت حساب حد فلوسه تضيع عليه
يبقى اول شئ نبعد عن الربح من خلال الانترنت
وسيبك من الناس اللى بتقولك احنا بنكسب دى ناس بتضحك على نفسها وعليك
عايز تتأكد من كلامى بص عليهم شوفهم شغالين شغل تانى جنب شغل الانترنت ولا لاء
او شوفهم راكبين عربيات موديلها كام اقولك الاسهل قوله عايز 100 جنيه سلف وشوف هيقولك معاه ولا لاء مش هتلاقى لان فعلا دول بيضحكوا على اللى حواليهم
الدراسة
النصيحة التانية لو انت بتدرس اهتم بدراستك
صدقنى لا لعبك كورة ولا بلاى ستيشن ولا فرجك على الافلام او قعدتك على نت هيفيدوك بشئ
كل دا وقت هتستمتع بيه فى لحظتها وبعد كدا هيروح مش هيرجع تانى
دراستك ثم دراستك ثم دراستك ولازم عشان تحب دراستك وتهتم بيها لازم تعرف ان دراستك هى اول خطوة فى طريق نجاحك وفكر دراستك هتفيدك قد ايه فى حياتك عشان تهتم بيها فعليا
الشئ الثالث دعم نفسك
مع كل سنة دراسية بتدرسها زود عليها مادة تدعم بيها نفسك بمعنى
لو عندك خمس مواد هتخليهم 6
لو عندك 6 هتخليهم 7
مش فاهم..!
افهمك
دراستك لوحدها غير كافية انها تساعدك انك تشتغل سوق العمل طالب مواصفات اكتر من مجرد دراسة
لنفرض انى داخل اولى كلية السنة دى
وكليتى 4 سنين
هعمل حاجة بسيطة خالص
اول سنة اخد كورس لغة انجليزية جنب الدراسة
تانى سنة اخد كورس ادارة اعمال فى الترم الاول
فى الترم التانى اخد كورس تنمية بشرية
تالت سنة كورس icdl  وبرامج الاوفيس وبرامج التصميم زى الفوتوشوب والاوتوكاد
رابع سنة اخد كورسات او دبلومات فى دراستى اللى بدرسها عشان تدعمنى بدل كلمة خبرة خمس سنوات اللى بنشوفها كتير
انا اديت امثلة فى الدراسة كل واحد ياخد الامثلة اللى فوق ويطبق عليها المجال اللى يناسبه من المواد
تفتكر لو عملت كدا واتخرجت صعب انك تلاقى شغل بمرتب كويس؟
اعتقد انك هتكون مطلوب من قبل شركات كتير وهتشتغل بسهولة وبسرعة
دا بالنسبة للطلبة
طب بالنسبة للى خلصوا وعايزين يعملوا مشاريع او بالنسبة للطلبة اللى عاوزين يعملوا مشاريع
يتابعوا الجزء الثانى


عدل سابقا من قبل Admin في الثلاثاء نوفمبر 25, 2014 4:08 pm عدل 2 مرات
الرجوع الى أعلى الصفحة اذهب الى الأسفل
https://shar7.arabepro.com
Admin
Admin



عدد المساهمات : 744
نقاط : 2721
تاريخ التسجيل : 24/10/2011

ازاى تكبر فى البلد دى Empty
مُساهمةموضوع: رد: ازاى تكبر فى البلد دى   ازاى تكبر فى البلد دى I_icon_minitimeالسبت نوفمبر 22, 2014 4:55 pm

الجزء الثانى


ازاى افتح مشروع ناجح
او ازاى اكون ناجح فى حياتى


اول شئ وقبل اى شئ لازم يكون شغلك هو رقم 1 فى حياتك
ولازم تفصل بين الشغل اى حاجة تانية ممكن بدون قصد تعرقل شغلك


وبما انى هتكلم فى الجزء دا على الناس اللى بتفكر تفتح مشاريع 


فا هبدأ بالاسئلة اللى بناءا عليها تفكر تفتح مشروع ولا لاء


اولا هل المشروع فى مجالك اللى انت فاهمه ولا لاء
وهل مجالك دا بتحبه ولا لاء
هل هيدرر عليك الدخل المعقول والمناسب انك تعرف تعيش بيه ولا لاء
هل معاك الامكانيات اللى تفتح بيها المشروع ولا لاء
طب لو مش معاك هل فى شريك هيكون معاك ولا لاء
طب لو فتحت مشروع هل فى احتمال تفتحه ناقص بعد الامكانيات الاساسية ولا لاء
طب هل لو فتحته ناقص الامكانيت دية دخله هيبقى مناسب ولا احتمال يخسر؟
هل فى يوم من الايام شايف ان فى حاجة ممكن تعرقل نجاح المشروع ظروف خاصة مثلا اى شئ من هذا القبيل هل فى ولا لاء

فى اسئلة كتير لازم نحطها فى ورقة وقلم ونبدأ نحط الاجابات وبناءا عليها نبدأ نفكر هل فكرة فتح المشروع دا هى فكرة صائبة ولا لاء
انا طبعا مش هجاوبلك على الاسئلة دية لان انت وحدك قادر على الاجابة على الاسئلة دية


انا هديك نتيجة خبرتى فى هذا المجال
قبل اى شئ عشان تعرف اذا كانت خبرتى مفيدة ولا لاء اقرأ اللى جاى
فى وقت من الاوقات قمت بفتح محل بس كان ناقصه شوية امكانيات
ووقتها فكرت ادخل جمعية عشان اعرف امسك فلوس اجيب بيها الحاجات اللى ناقصة فى المحل
بس صاحب الجمعية حطنى اقبض السادس بعد 3 شهور تقريبا
والدى وقتها قالى لاء تقبض اول او تانى على اقصى تقدير
طب ماهو مش هتفرق
كدا كدا هقبضها سواء الاول او السادس كدا كدا هقبض
بس هنا كان له وجهة نظره اللى كانت غايبة عنى
انا لما اقبض الاول او التانى كدا هقدر اجيب الحاجات اللى ناقصة بدرى بدرى وبالتالى دخل المحل هيرتفع مع بداية الشهر التانى واحتمال الخسارة فى المحل تقل لانى كملت بضاعته
طب لو قبضت السادس يبقى دخل المحل هيزيد من الشهر الرابع
واحتمال يكون المحل بيخسر من الفترة اللى قبلها واكون صرفت جزء من رأس المال الاساسى على ايجار او كهرباء او خلافه
وبالتالى ممكن ارجع لنقطة الصفر او اعلى منها بحاجة بسيطة


اللى حكيته فوق دا هو دا اسمه الخبرة
تاخدها وتنفذها لانها اكيد فى صالحك


اول شئ 
متفتحش مشروع ناقص مهما كان
لازم تعرف ان المشاريع فى مصر بالكاد تدخل دخل الى حد ما مناسب ان مكنش اقل من المناسب 
ولازم تعرف ان المشروع مش هيكملك الحاجات اللى ناقصة لان المشروع لو ناقص يدوبك هيسد تكاليفه بالعافية
ناخد مثال
لنفرض انك هتفتح مشروع دخله لو المحل كامل هيبقى متوسطه مثلا من 2000 ل 2500 جنيه
بس الفلوس اللى معاك هتخليك تفتح بامكانيات اقل هتخلى المشروع يدخل شهريا متوسط 1000 جنيه
وانك عشان تكمل اللى ناقص فى مشروعك محتاج حوالى 1500 جنيه
وانت تكاليف ايجارك وكهربتك شهريا حوالى 800 جنيه
هنا اصبح عندك 200 جنيه صافى مكسب بس انت عندك مصاريف تانية خاصة بيك
بالتالى انت صعب انك تكمل اللى ناقص عندك الا بعد حوالى مثلا 6 شهور على اقل تقدير فى حالة مصرفتش جنيه من ال 200
يعنى كدا احتمال الخسارة وغلق المكان كبيرة جدااااااااااا يبقى متفتحش

الشئ الثانى الانطباع
اعرف ان الزبون فى مصر بيجيلك مرة او مرتين لقى محلك ناقص حاجات من اللى بيحتاجها يبقى نسبة احتمال انه ميجيلكش تانى وصلت 95%
وال 5%  الباقيين هيجيلك فى الاعياد والمناسبات اللى بيكون محتاج فيها حاجة وعارف ان بقية اللى فاتحين فى مجالك قافلين ساعتها بيجرب يجيلك يمكن يلاقيك فاتح ويمكن يلاقى الحاجة اللى عايزها


يبقى اتفقنا متفتحش مكانك ناقص ابدا مهما حصل


الشئ الثالث
رأس المال
رأس المال لو قدرت انت توفره من مالك الخاص يكون كويس متوسط رأس مال المشاريع الصغيرة فى مصر تبدأ من 1000 جنيه ل 15000 


يفضل ان المال دا يكون مالك طب مش معاك يكفى وانت نفسك تعمل مشروع بتاعك انت يبقى مفيش مانع نبدأ من اول السلم عشان نوصل للى احنا عايزينه


مفيش مانع اشتغل عند حد فى اى مجال مش شرط يكون مجالى لمدة سنة او سنتين اجمع المبلغ اللى يكفينى افتح المشروع وبعد كدا افتحه


ومتنساش انك قبل اما تفتح لازم تكون شايل على الاقل ايجار 4 شهور معاك احطياتى عشان لو المشروع ممشيش متخرجش مديون.. لاء تسد الايجار من فلوسك انت


طب فى حالة مش حابب تشتغل عند حد وفى حد ممكن تستلف منه فلوس
يبقى لازم تضمن انك هتعرف ترجع الفلوس دى بطريقتين
اولا تكون البضاعة اللى هتشتريها فى مشروعك لا تقل قيمتها بالتقادم يعنى يوم ما تحب تقفل وتبيعها هتبيعها بخسارة مادية قليلة جدا جداااا


او ان يكون عندك دخل تانى شهرى يقدر يسد من عليك فى حالة خسارتك فى المشروع زى معاش او مرتب وظيفة لو انت موظف او اى شئ من هذا القبيل


الشراكة


فى اى مشروع فى الدنيا اعرف ان لو دخل فيه شراكة هيفشل بنسبة 99% حتى لو كان شريكك صاحبك متنساش ان فكركوا مختلف واكيد اكيد هتختلفوا فى ادارة المشروع 
وبالتالى يفضل بلاش منها خالص ولو على اضطرار يعنى مثلا اللى هيديك الفلوس بيقولك شرط اكون شريك يبقى شرطك بما انك انت اللى هتتعب وهو اللى هيدفع ان الادارة الكاملة ليك وميكونش له الحق انه يعترض على اى قرار مهما كان بس برضه لازم تضمنله انك ماشى صح وانك بتكبر المشروع وبتنجحه عن طريق التقارير الاسبوعية للمشروع كمان فى حاجة لازم يكون المكسب النص بالنص هتقولى ازاى وهو الممول للمشروع؟ هقولك هو الممول اه بس انت المدير الكامل للمشروع وبالتالى انت اللى هتتحمل اى خسارة للمشروع وبالتالى هتكون مطالب ترد للشريك كل اللى دفعه فى حالة المشروع خسر او فى حالة ان ربح المشروع قبل بداية الخسارة مغطاش رأس المال اللى دفعه وزيادة
مثال لتوضيح الفقرة السابقة
الشريك دفع 10000
المشروع اتفتح وخسر 3000 من اصل رأس المال
هنا انت ملزم تردله المبلغ
طب المشروع قعد 6 شهور كل شهر بيكسب 4000 مثلا انت 2000 وهو زيك
هنا هو عوض رأس ماله اللى دفعه واخد فوقه 2000 جنيه هنا انت مش ملزم ترجعله حاجة
طب انت هتكون كسبان اكتر منه؟ لاء لان فى الوقت اللى انت شغال فيه فى المشروع بتاخد مقابل شغلك فى حين هو ممولك ومبيشتغلش قاعد فى البيت يقبض على الجاهز او شغال شغل تانى اضافى بيدخله دخل
يعنى مظلمتوش ولا ظلمت نفسك


التكاليف الاولية للمشروع
مش هتكلم فى تفاصيلها لانى معرفش انت ناوى تفتح ايه بس هقولك لو ناوى تفتح مشروع وانت حطيت تكاليف بالورقة والقلم لقيتها 10000 جنيه مثلا حط زيادة من عندك فى ورقة التكاليف 2500 جنيه تكاليف غير معروفة ممكن تتفاجأ بيها متكونش حاسبها 
ولو مش عامل حسابك ليها ممكن المشروع يخسر فلازم تكون عامل الحساب المادى على الاقل عشان المشروع ميقفش


ايا كانت تكلفة المشروع حاول تحط 25% من رأس المال اللى انت حسبته على المشروع دا غير الايجار اللى اتكلمنا عليه طبعا


الخبرة
عشان تفتح مشروع ومتخسرش فيه وتعرف تنافس غيرك لازم يكون عندك الخبرة الكافية سواء فى ادارة المشروعات عموما او فى مجال المشروع نفسه
لنفرض مثلا انك هتفتح سوبر ماركت ولنفرض ان سعر الجملة للسكر مثلا 4.5 وبيتباع فى اى حتة ب 5 وبما ان معندكش خبرة اشتريته انت ب 4.85 قرش او ب 5 جنيه هنا انت عشان تكسب على الاقل ربع جنيه يبقى هتبيع الكيلو ب 5.25 اغلى من برا وعشان تكسب نص جنيه فى الكيلو زى برا هتبيعه ب 5.5
الزبون ساعتها هيعرف انك غالى فا مش هيجيلك وهتبقى انت الخسران وبالتالى لازم يكون عندك خبرة فى المجال اللى هتفتحه


المشروع لازم يكون حلال
الشرط دا اساسى جدا صدقنى فى مشاريع قايمة على الحرام كتيرة جدااا بس والله فى الاخر اصحابها بيبعوا اللى وراهم واللى قدامهم الحلال بيدوم والحرام ممكن ربنا يبتليك بمرض ياخد كل اللى كسبته 
حاول تتحرى الحلال قدر الامكان 


الورقة والقلم


عشان تنجح لازم تقفل حساباتك يوميا بورقة وقلم والفلوس اللى ليك واللى عليك وبعت بكام واجمالى اللى دخل كام وصافى الربح من اللى دخل كام وهكذا عشان تعرف تمشى فى المشروع صحيح يوميا هتاخد منك متوسط ساعة بس الساعة دى مهمة جدا جدااا
ايضا التعامل مع الزبائن خصوصا لو بالاجل لازم يكون بالورقة والقلم ويمضوا على ايصالات لو لزم الامر مفيش حاجة اسمها دا محترم دا مش عارف ايه كفاية انه يكون عارف انك قدرته واديته الحاجة اجل وانت مبتبعش اجل اصلا ودا تقديرك له هقدرك فى انى هستنى على الفلوس لغاية لما تجيبها فى المعاد اللى قولت عليه اللى مقدرش اقدرك فيه الايصال ولو هيحصل احراج فى التعامل بالطريقة دية من الممكن بسهولة تقول الفلوس بتاعة المكان مش بتاعتى وانا معايا شريك بيراجع معايا الحسابات يوم بيوم ودى طريقته فى الشغل 


اخيرا التميز


مفيش مشروع فى الدنيا الا ومفتوح منه على الاقل منه واحد او 2 فى كل مكان
وبالتالى لازم تكون مميز عشان تقدر تنافسهم والتميز مش بس فى انك توفر اللى مش موجود فى الاماكن التانية اللى فاتحة جنبك؟ ولا انك تكون ارخص انت ممكن تكون اغلى وتكون مميز فى نفس الوقت الهواتف الاصلية غالية ورغم كدا الناس بتشتريها ومتشتريش الرخيص لانها بتكون مميزة بجودتها الاهم بقى من دا كله تكون مميز بمعاملتك مع الناس ولسانك حلو مفيش مانع تعزم الزبون دا على شاى تتفق مع الزبون التانى تيجى نخرج نتعشى برا تقول لزبون تالت انا جاى اقعد معاك شوية تقول لزبون رابع تعالى معايا مشوار نتمشى سوا كل دا بيشد الناس لمكانك واللى دفعته ملاليم النهاردة بكرة هتاخده مئات لان الزبون المهم عنده المعاملة قبل اى شئ


تقريبا انا حطيت اهم النقط فى الجزء دا


ننتقل للجزء الاخير وهى افكار لمشاريع بمبالغ صغيرة من 1000 فيما فوق
الرجوع الى أعلى الصفحة اذهب الى الأسفل
https://shar7.arabepro.com
Admin
Admin



عدد المساهمات : 744
نقاط : 2721
تاريخ التسجيل : 24/10/2011

ازاى تكبر فى البلد دى Empty
مُساهمةموضوع: رد: ازاى تكبر فى البلد دى   ازاى تكبر فى البلد دى I_icon_minitimeالثلاثاء نوفمبر 25, 2014 2:31 pm

الجزء الاخير
مشاريع برأس مال صغير
لمن لا يملك رأس مال
او زى ما بيقولوا مشاريع ب 1000 جنيه


وانا هنا هسرد افكار للمشاريع واللى قدرت اجيب بعض تفاصيل عنه هحطها 
والغرض هنا مش انى احطلك مجرد افكار الغرض انى افتع عينك ان فى مجالات كتيرة ممكن تكسب منها
ممكن تكون مش واخد بالك منها
وانت تقدر لو عجبتك فكرة مشروع انك تدور على تفاصيله على النت وتسأل الناس حواليك وتبتدى فيه برأس مالك الصغير
شريطة متستكبرش وتقول دى مش شغلتى دى شغلانة تقل القيمة والكلام دا
الشغل مش عيب العيب انك تكون راجل ومبتشتغلش ولا فى جيبك قرش تمشى بيه


الجزء الاخير دا هينقسم لجزئين
جزء مختصر سريع
وجزء مفصل بعض الشئ


الجزء الاول


1- اشتغل فى بيع الزيوت المستعملة
2- هاتلك روتر انترنت وسويتش واشترك في انترنت سرعة عاليه ووزع على الناس اللى حواليك
3- هاتلك برنتر واسكانر على الكمبيوتر اللى انتا قاعد علية دلوقتى إلصق ورقة علي بيتكوا يوجد مكتب لخدمة رجال الاعمال واكتب واطبع وابعت اميلات
4- او تحاول تاخد بيهم دورة في الفوتوشوب أو الكارول درو او في الشبكات او في الاوفس وتروح تشتغل في اى مكان بيقدر الحاجات سواء ستوديو تصوير او شركة اعلانات وتصميم او انشالله حتى مكتب كمبيوتر
5- وممكن تعمل زى كتير من الشباب المكافح تشتري اكسسوارات وتحاول تبيعها انشالله حتى لأصحابك
6- وممكن تروح تشتري ملابس مستعمله وتنضفها وتكويها وتبيعها للناس بسعر اعلى وطبعا تعرفهم انها مستعملة بس اختار حاجات حلوة
7- وممكن تديهم لسواق سيارة نقل يجبلك مثلا حموله اغراض معينه لشركة معينه وتاخد عمولتك من الشركة ومن السواق
8- او تأجر قطعة ارض صغيرة ولو حتى قيراط وتروح تشتري مجموعة من الشتلات وتضعها في الارض وبعد شهر من مراعتها تبيعها باضعاف ثمنها وتدفع إيجار الأرض .. هذا اذا كنت تهوى الزراعة
9- إذهب إلي مديرية الزراعة وأسأل عن مشروع عيش الغراب وتكلفته لا تتعدى 300 جنية وتحتاج فقط لغرفة رطبة وكمية قش ارز مبلل ودورة راس المال خمسة واربعون يوما والتسويق سهل
10 - مشروع دودة القز وبيع الحرير تكلفته ايضا صغيرة
11 - مشروع الارانب
12- تنقية المياة بالكيماويات المعتمدة والغليان
13 - استخراج الفضة الخام من افلام النيجاتيف لدى استديوهات التصوير بأحواض الترسيب
=========
مشروع بـ1000 جنيه
ممكن انك تشغل فلوسك دى فى حااجه مضمونه بنسبه 100% 

الدهب حضرتك ممكن تجيب بالاف جنيه دول دهب وتركنه فى البيت شهرر شهررين 

على قد متقدررررر طبعاا الدهب سعرره بيطلع مبينزلش هتجيب مثلا بالف جنيه دى الدهب

وتستنه لمه سعره يطلع وتبيع مكسبك مش هيبقى كبير اووى تقريبا هيبقى 25% 

وكل متزود راس ماالك هيزيد معاك ربحك ونصيحة لما تشترى الدهب علشان تتاجرى فية اشترى جنية دهب او دهب مستعمل علشان المصنعية ومتخسريش حاجة 


ازاى تكبر فى البلد دى A-stor10


من عشر سنين كان ليا صاحب فى الثانوية كان دماغه فى المشاريع والحاجات دى ومكانش معاها فلوس غير مصروفه حوش مصروفه وجاب جوز حمام طبعا هو كان بيحكيلى وكنت بضحك عليه وبدأ يكبر الجوز اللى معاه حبة حبة بقو جوزين وتلاتة لغاية مابقى عنده عدد من الحمام كويس بدأ يبيع منه ويحوش لغاية مابقى عنده فلوس تكفى يجيب معزة جاب معزة عشر وهكذا المهم انا سيبت البلد وعشت فى محافظة تانية واتبهدلت واتمرمطت من شغلانة للتانية ورجعت فاضى لبلدنا تانى ممعيش غير شوية ملاليم وفوجئت بصاحبى اللى كنت بضحك عليه بسم الله ماشاء الله بقى عنده مزرعة مواشى كبيرة فيها عدد كبير جدا من المواشى المهم من القصة دى انك لو مبدأش دلوقتى وقولت الالف جنيه هتعمل ايه هتلاقى نفسك بعد عشر سنين ممكن ميكونش معاك حتى الالف جنيه دى اهم حاجة لازم تبدأ ويكون هدفك فى الاول تكبير المشروع مش الربح وايه هو المشروع ده حسب ظروفك انت يعنى انت لو قاعد فى شقة هيكون عندك خيارات اقل من انك لو عندك بيت وحولين منه وسع او عندك سطح المكان هيفرق معاك فى اختياراتك لانك هتبدا بمبلغ صغير مش هينفع تتأجر مكان دلوقتى..


الجزء الثانى
بعض المشاريع مفصلة


ملحوظة بعض الاسعار قد تكون غير حقيقية لانها موضوعة من عدة سنوات وقد قمت بجلبها عن طريق الانترنت
لكن انت ممكن تحسب النسب الموضوعة فى الموضوع وتحسب على اساسها


بيع الزيوت المستعملة
مشروع مربح جداً ورأس مالة قليل جداً لايتعدى الالف جنية او اقل من ذلك، والفكرة عبارة عن المتاجرة بزيت الطعام المستخدم من قبل او بمعنى اصح زيت الطعام الذى استخدم فى عمليات القلى والتحمير ويتخلص من الناس، وانت تقوم بشراء هذا الزيت بسعر وليكن جنية ونصف للكيلو الجرام الواحد ومن ثم بيع نفس الكيلو جرام هذا بسعر يتراوح بين ثلاث جنيهات الى ثلاث جنيهات ونصف


من اين تحصل على زيت الطعام المستخدم من قبل:


يتم الحصول علية من اماكن عديدة جداً ومنها محلات الفول والطعمية ومحلات الاكل عموماً والفنادق ومحلات الحلويات وغيرها من الاماكن التى تستهلك زيوت الطعام بكميات كبيرة، ويتم شراء كميات بالاتفاق بينكم وليكن سعر الكليو الواحد هو جنية ونصف او اقل.


بيع الزيوت المشتراة:


والان بعد ان اشتريت كمية جيدة من الزيوت المستهلكة حان الان موعد بيعها وتحقيق الارباح، ويتم البيع لمصانع صناعة الصابون واستخلاص الجلسرين وغيرها من هذة المصانع والشركات ويتم بيع الكليو جرام الواحد بسعر يتراوح بين ثلاث جنيهات الى ثلاث حنيهات ونصف، وبالتالى فإن فارق السعر بين البيع والشراء هو فارق مرضى جداً.


لجعل بيع الزيوت مشروع مربح اكثر:



لكى يكون مشروع مربح اكثر ويحقق اهدافك يجب عليك شراء كميات اكبر من الزيوت ومحاولة شرائها بسعر اقل وليكن شراء كميات تقدر بـ 1000 جنية وهذا يعنى شرائك لنحو 700 كيلوا جرام، ومن ثم بيع هذة الكميات الى الجهات المذكورة مسبقاً بسعر يقدر بنحو 2450 جنية وهذا يعنى ان الارباح زادت مرة ونصف عن رأس المال، وكلما زاد رأس المال اصبح تجارة زيت الطعام مشروع مربح اكثر


الكروشيه
المنتج دا مفيش مصانع بتصنعه وفى ناس كتيرة بتطلبه وقليل اللى بيعمله لو حضرتك قدرتى تعملى منتجات كروشيه واشتغلتى على اللى حواليكى هتكسبى فى المتوسط 500 جنيه كحد ادنى وميزته انك تقدرى تشتغليه قدام تلفزيون وانتى بتتابعى مسلسلاتك عادى وكمان مش مكلف ممكن بداية المشروع تبقى 500 جنيه كحد اقصى طبعا كل اما تشغلى حد معاكى وتكبرى المشروع هتكسبى اكتر


تربية الحيوانات
زى الارانب والمواشى هاتلك ارنب دكر و4 ارانب امهات مش هتتكلفى غير 1000 جنيه باكلهم وشربهم والتحصين بتاعهم ، ممكن تربية المعيز ممكن معزتين تلاتة صغيرين وجدى تربيهم وتبدأى تشتغلى على الانتاج بتاعهم معرفش تفاصيل ارباحهم ايه بس المواشى من اكبر المشاريع مكاسب فى مصر عموما واللى بيتاجروا فيها اصحاب املاك


ممكن مكن خياطة
لو ليك او ليكى فى الخياطة ممكن محل صغير على قد الخياطة والتطريز المشروع مش هيكلفك غير المكنة والخيط والابر وما شاء الله المشروع مكسبه دهب الخياطة مبتكلفكش 10 قروش بتاخد فيها 2 جنيه اقل حاجة


تربية البط
لو انت عندك مكان فاضي شقة فاضية مش متشطبة على المحارة والمكان اللي انت 
فيه أرياف ممكن تربيلك شوية بط .... آه بط انت عارف ان المشروع دا بيكسب 
كتير جدا وممكن الالف جنيه دول ينفعوا كبداية هتجيبلك حوالي 250 بطة عمر 
يوم وهتبيع بعد 10 أو 12 يوم بالكتير ممكن تكسب في البطة من 0.75 قرش لـ1 

ولا السوق شادد ممكن توصل لـ 1.25. 


مشاريع بيع اكسسوارات الكمبيوتر والموبايلات


فى الموبايلات مش هقدر افيدك قوى لكن فى الكمبيوتر ممكن افيدك شوية 
بيع الجملة فى الكمبيوتر مبيعتمدش على كمية البضاعة المباعة سعرها كام
لكن بيعتمد على عدد القطع المتباعة من كل وحدة
يعنى لو اشتريت بضاعة تمنها 10000 منوعة كيبوردات على ماوسات على باورات على سماعات وخلافه ممكن الكيبورد يقف عليك جملة ب 16 جنيه مثلا زى التجار الباقيين بيشتروه
ليه؟
لان انت اشتريت من الكيبوردات شريحة اولى ومن الماوسات شريحة اولى بمعنى
تجار الجملة بيحسبولك الشراء من كيبورد ل 10 هتاخد بسعر 16 جنيه ملوش دعوة انت واخد بضاعة تانية معاه ولا لاء ومن 11 ل 30 سعر الكيبورد 15.25 من 30 فيما فوق يحسبهالك ب 14.5
انت العب على النقطة دية 
عندك على سبيل المثال حوالى ما لا يقل عن 200 شركة كمبيوتر كل واحدة فيهم مثلا بتستهلك شهريا حوالى 50 كيبورد فا بيشتروا شريحة اولى مبيشتروش كتير
ممكن انت تكسب بانك مثلا هتجيب كيبوردات بسعر اقل شريحة لانك هتجيب كميات وتبيعها للشركات دية بسعر اقل من سعر الجملة على الشريحة الاولى
مثلا هتشترى الكيبورد بسعر 14.5 وهتبيعه على 15.5 اقل من جملته بنص جنيه
يعنى الشركة اللى هتاخد منك شهريا 50 كيبورد وفرت لنفسها 25 جنيه عن طريقك
هتكسب انت من الشركة الواحدة معدل 50 جنيه فى 200 شركة هتدر دخل مش هيقل عن 8000 جنيه لو انت عملت خصومات على السعر ومصاريف وخلافه
نفس النظام لاكسسوارات الموبايلات


مشروع الصيانة فى المنزل
لو انت شاطر فى صيانة الكمبيوتر ممكن بدل ما تفتح محل وانت مش معاك رأس مال كافى ممكن ب 500 جنيه تبدأ مشروع كامل عن طريق صيانة حاسب الى فى المنزل هتتكلف حوالى 100 جنيه اعلانات كبداية حد اقصى
فلاشتين 16 وفلاشة 8 بحوالى 130 جنيه
هتحط على ال 8 ويندوزاتك اللى هتسطبها وعلى ال 16 الاولى نفس الويندوزات اللى على ال8 عشان لو فلاشة اتفيرست يكون معاك نسخة احطياتية بالاضافة لبرامج على بقية مساحتها
ال 16 التالتة تعريفاتك وبقية البرامج اللى ممكن تحتاجها
هتشترى باور سبلاى و 3 رامات مختلفين واحدة ddr1 والتانية ddr2 والتالتة ddr3
لاعطال الرامات اللى هتقابلك فى الاجهزة
سعرهم ال 3 160 جنيه
هتشترى علبة تنر صغيرة وفرشة دهان حوائط صغيرة وشنطة تحط فيها حاجتك دى كلها
وشغلك هيبقى عن طريق التليفون الزبون يتصل هتروحله تعمله الصيانة فى مكانه مش هتتكلف جنيه وهتكسب متوسط يوميا متوسط من 40 ل 100 جنيه


نفس النظام لصيانة الدش والتلفزيون والموبايلات خصوصا الموبايلات مفيش بيت الا وفيه 2 او 3 موبايلات على الاقل لو عرفت تطلع من كل موبيل بجنيه هتكسب الوفات مؤلفة


عمل شبكة انترنت
بكيسة كمبيوتر متساويش 150 جنيه وكرتونتين سلك ب 160 جنيه و حوالى 6 سوتشات ب 200 جنيه + التقديم على خط نت هيكلفك حوالى 400 جنيه تقدر تعمل شبكة فى محيط حوالى 600 متر
والمساحة دى ممتازة جدا جدا لانها هتغطيلك تغطية تقريبا ميقلش عن 80 مشترك على اسوأ اسوأ الاحوال
ونوع فى اشتراكاتك وكل واحد على حسب اشتراكه ابدأ من 15 جنيه ل 50 جنيه 
كل واحد على حسب جودة الخدمة اللى عايزها صدقنى هتكسب كتير طول ما الخدمة بتاعتك ممتازة ومحدش هيبص على الفلوس


نعلى شوية برأس المال


التكاتك
هاتلك توكتوك ولو بالقسط مش لازم تشتغل عليه ممكن تشغل حد عليه ورديتين الوردية هتصفيلك حوالى 150 جنيه اللى شغال هياخد من 30 ل 40 جنيه والتوكتوك هياخد منك فى الوردية الواحدة جزء للقسط وجزء للتكاليف حوالى 40 زيهم يبقى انت كسبان 70 فى الوردية فى ورديتين 140 جنيه داخلين جيبك


مكنة تصوير
ممكن تجيب مكنة تصوير وتقف بيها عند مدرسة او بنك او محكمة زى محاكم الاسرة وممكن توقف حد بيها صدقنى المكنة بتصفيلها فى اليوم ما لا يقل عن 150 جنيه صافى ارباح بعد التكاليف ومرتب اللى واقف


وقبل اما اختم اسيبكم مع الفيديو دا لقيته على اليوتيوب انا مسمعتوش لسة هسمعه زيكم
بس قبل اما احط الفيديو ملحوظة
فى افكار تانية كتيرة جدا محطتهاش ممكن لانها مجاتش فى بالى ممكن او ممكن انى لو فضلت احط افكار مش هخلص الموضوع المهم انى وجهت بصيرتك انك تفكر وتدور وتطلع بفكرة مشروع قدر الامكان
وان مفيش حاجة اسمها مستحيل حتى لو مش معايا غير 1000 جنيه 
فى النهاية ليا طلب صغير
الموضوع دا مش عاوز عليه فلوس ولا عايز من وراه مكسب انا كتبته وتعبت فيه عشان اوفر على اللى هيقراه التعب اللى انا تعبته عقبال اما اكتسبت الخبرة اللى وصلتلها دلوقتى
فا بقدمهالك بدون ادنى تكلفة
كل ما ارجوه هى دعوة صالحة ليه بظهر الغيب بأن يرزقنى الله حسن الخاتمة 
فقط لا غير


الفيديو






الرجوع الى أعلى الصفحة اذهب الى الأسفل
https://shar7.arabepro.com
Admin
Admin



عدد المساهمات : 744
نقاط : 2721
تاريخ التسجيل : 24/10/2011

ازاى تكبر فى البلد دى Empty
مُساهمةموضوع: رد: ازاى تكبر فى البلد دى   ازاى تكبر فى البلد دى I_icon_minitimeالجمعة يناير 01, 2016 3:59 pm

شاب عربى
الرجوع الى أعلى الصفحة اذهب الى الأسفل
https://shar7.arabepro.com
 
ازاى تكبر فى البلد دى
الرجوع الى أعلى الصفحة 
صفحة 1 من اصل 1
 مواضيع مماثلة
-
» ازاى تبحث عن ملف ضايع منك وانت مش عارف اسمه
» ازاى تتاكد انى تعريفات كروت مفيهاش مشاكل ؟ خش واقولك

صلاحيات هذا المنتدى:لاتستطيع الرد على المواضيع في هذا المنتدى
شرح :: القسم العام :: المنتدى العام-
انتقل الى: