شرح

افضل موقع شرح عربى متكامل
 
الرئيسيةالبوابةاليوميةس .و .جبحـثالأعضاءالمجموعاتالتسجيلدخول الروبوت جالب المواضيع





شاطر | 
 

 الخلاصة فى الشبكات

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
Admin


عدد المساهمات : 692
نقاط : 2567
تاريخ التسجيل : 24/10/2011

مُساهمةموضوع: الخلاصة فى الشبكات   الثلاثاء فبراير 03, 2015 6:06 pm

السلام عليكم ورحمة الله وبركاته




موضوعى النهاردة كتبته عشان خاطركم مش عشان خاطر نفسى الموضوع هيبقى طويل شوية وفيه رغى كتير
بس مفيد ومهم لكل واحد عنده شبكة نت
واذا كنت هتتعب من قرايته افتكر انا تعبت قد ايه فى كتابته عشان افيدك
الموضوع ده هو خلاصة فشل فى 4 شبكات 
وخلاصة خبرة 10 سنوات فى شبكات الانترنت
وبالتالى اللى هقوله ده يخليكم تبتدوا من النقطة اللى انتهيت عندها بدل ما تبدأوا من الاول خالص




لكل اللى عنده شبكة نت وعنده خبرة كفاية الى حد ما مخلياه عامل الشبكة الموضوع ده مهم
اللى معندوش شبكة ميفكرش يعملها لان من الاخر هتفشل وهتضر غيرك من اصحاب الشبكات اللى شغالين حاليا
فا الله يرضى عليك ابعد عن المجال ده عشان متضرش غيرك




شوية نصائح للمحافظة على شبكتك وتوسيعها والربح منها
ملحوظة فى بعض النصائح الكل عارفها بس لازم اكتبها للتذكير




اولا : الخدمة
انت عامل شبكة نت ومن الاخر فى خدمة فى مكسب مفيش خدمة مفيش مكسب فلازم فى الاول والاخر تفكر فى النقطة دية لانها اهم ما فى الموضوع كله
الخدمة ثم الخدمة ثم الخدمة 




ثانيا : سمعتك

سمعتك صدقنى كل اما خدمتك هتبقى سيئة كل اما سمعتك هتبقى سيئة وبالتالى إنحصار الطلب على الاشتراك منك غير انك بتخسر مشتركين من عندك بالطبع




ثالثا : الاسعار

اولا متبصش على الاشتراكات فى الشبكات التانية ايه خليك فى نفسك خليك انت مش حد تانى برا فى ناس بتدى نت ب 15 جنيه وب 10 جنيه عادى فى ناس بتدى ب 100 جنيه و ب 75 جنيه برضه عادى خليك انت فى نفسك انت قدر سعرك صح ومتقولش متوسط الاشتراكات 30 او 25 زى ما فى معظم الشبكات
90% من الشبكات الاشتراكات متوسطها من 25 ل 35
وال 90% دول خدماتهم سيئة ومبيكسبوش والناس بتشتكى منها والبوستات فى الجروب تشهد بكدا
فا خليك نفسك على اهتمامك وشغلك خد تعبك فى سباك ياخد 50 جنيه وفى سباك ياخد 150 الاولانى مش زى التانى انا اسف فى التشبيه
قارن اشتراكات دلوقتى باسعار المنتجات دلوقتى والمعيشة واشتراكات زمان باسعار زمان
يعنى كل حاجة زادت ثمنها على الاقل ثلاثة اضعاف والنت اشتراكه ثابت زى ما هو متغيرش يعنى مكسبك ثابت زى ما هوا
وبالتالى لازم تغير منظومة اسعارك ملكش دعوة بغيرك دا لو عاوز تكسب 
انا مثلا عامل الاشتراكات عندى ب 50 جنيه
صحيح فى ناس عندى مبترضاش تدفع غير 25 و 20 بس دول بتصرف معاهم على قد فلوسك خد خدمتك بموتلهم السرعة عشان الشبكة تشيل اكبر عدد ممكن اقدر اكسب  منها
وافتكر الزبون اللى بيدفعلك 20 جنيه لما مبيعحبوش النت بيروح يشترك فى الشركة ب 95 جنيه
يعنى معاه فلوس بس بيطلعها بمزاجه
الشطارة انك تعرف تطلعها انت منه متخليش الفلوس تروح برا




رابعا : شغلك

انا هتكلم فى الشبكات السلكية انا مدخلتش فى انظمة الواير لس عشان افيدك بس اللى عنده واير لس يقرا اللى هكتبه لانه برضه هيستفاد
وهيعرف قد ايه الغالى تمنه فيه
على مدار السنوات اللى فاتت كنت فهلوى بشترى ارخص السلوك وباسعار الجملة وارخص الارجيهات الارجيه ابو بيرزة ده وعلق وزى الفل
ولانى مكنتش بكتر عن 100 متر فا السلوك كانت بتشتغل معايا الى حد ما كويس بس بعد شبكة و 2 و 3 اخدت الخبرة الكفاية محدش بيتعلم ببلاش وقدرت اطلع بالفايدة اللى تخلى اى حد عامل شبكة يكسب ويرتاح
اولا متشتغلش غير بسلوك نضيفة وغالية خصوصا فى الخطوط البعيدة يفضل سلوك عالية الجودة وتكون ال 8 اطراف فيها نحاس
صحيح سعرها بيبقى ضعف سعر الكرتونة العادية اللى بنشتريها بس صدقونى اعرفوا حاجة الغالى تمنه فيه وهتلاحظوا الكلام ده
مقارنة سريعة
كرتونة سلك ام 80 جنيه وكرتونة سلك من ام 160 جنيه فيما فوق
الاولى المتر بتاع السلك 80 سم التانية المتر بتاعها متر يعنى فرق حوالى 75 متر عن الكرتونة الاولانية
الاولى اخرها 100 متر التانية بترمى 140 متر من المتر بتاعها بمقياس الكرتونة الاولانية بترمى 175 من المتر بتاع الكرتونة الولانية
لان المتر فيها متر
الاولى جودة وخامة السلك وغلافه رديئة بيتقطع وانت بتفرده التانية متية وقوية تماما
الاولى مبتستحملش قوى فى العوامل الجوية التانية بتستحمل
الاولى مع طول فترة الاستخدام بيطول بيزيد حوالى 2 متر او 3 متر ده بيأثر على سرعته
التانية عندى الامكانية ارمى مسافة اقل بحيث لو طول مع طول فترة الاستخدام سرعته متتأثرش
الاولى لو حصل قطع فى طرف وليكن الاخضر مثلا هتضطر تنزل السلك وتشوف القطع فين
ياسلام لو السلك رئيسى والقطع حصل بالليل وهتاخدلك سكة ساعتين تلاتة عقبال اما تعمله
الثانية انسى الموضوع ده الثانية ال 8 اطراف كلها نحاس يعنى ممكن تعمل منها ارجيهين فى كل طرف
وبالتالى اى قطع فى الخطوط الرئيسية بالذات هتحله فى اقل من نص ساعة هتركب الارجيهين التانيين فى كل طرف وتشغل الناس
عقبال اما تنزل بالنهار تشوف المشكلة فى ايه
السلك الاولانى عمره الافتراضى قصير وجداااااااا يعنى يعنى لو جايبلك نت النهاردة مش هيجيبلك كمان كام شهر
الا اذا كان مداه مثلا 120 متر وانت رامى 100 بس ده ميمنعش انه بيتبهدل منك بسبب ضعف جودة ومتانة السلك
السالك التانى بيعيش معاك بالسنوات وقوة تحمله اكبر خصوصا انه بيرمى مسافات واحنا اغلبنا بيرمى فى رينج كل 100 متر سوتش
وطبعا متسترخصش وتشترى اقل كرتونة سلك 8 اطراف نحاس فى سلوك ب 120 جنيه و 130 جنيه
بس النحاس اللى جواها خفيف ميستحملش المسافات واشارته بتضعف بسرعة
خلاصة الكلام فى الموضوع ده اصرف تلاقى والغالى تمنه فيه وصدقنى هترتاح مش هتندم
انا فى عاصفة الهوا اللى حصلت فى الشهر اللى فات ده مرمشتش حتى
ولا النت فصل دقيقة واحدة حتى ما شاء الله والحمد لله
نفس الموضوع نطبقه على الارجيهات الارجيه ابو بريزة بيتأثر برطوبة الجو وخلافه والنحاس بتاعه ضعيف
مفيش مانع ارجيه افضل واغلى شوية
قيس على كدا شغل الواير لس
حاجة كمان متستخدمش الطاقة القصوى لاى حاجة بتشتريها عشان متتهلكش منك بسرعة جداااااااااااا
يعنى سوتش 8 بورت استخدم منه 6 مثلا
اكسس بيطلع ل 13 اى بى طلع ل 10
سلك بيرمى 140 طلع انت 110
صدقنى هترتاح جدا جدا جداااااااااااااااااااااااا
وهتدعيلى لما تنفذ الكلام ده




خامسا : المشترك
بص يابرنس طبعا كلنا كأصحاب شبكات متفقين اننا بنتعامل مع اوسخ فئة فى المجتمع بلا منافسة الا قلة قليلة محترمة
زبون النت عايز يسرقك عينى عينك وكمان بعد اما يسرقك يقولك انت ظالمنى جايبلى الخدمة زبالة
عاوز يتصل بيك الصبح بدرى يلاقيك الظهر يلاقيك العصر المغرب العشا نص الليل 3 الفجر 5 الفجر
فى كل وقت تبقى صاحى مبتنمش زى بقية البنى ادمين ومبيعجبوش
لو جبتله لبن العصفور مش هيعجبه
افتكر كانت الشبكة عندى بايظة تماما وفجأة لفيت على المشتركين وقولتلهم هبدأ عملية تنضيف شاملة للشبكة
لان النت كان بيفصل اكتر من 20 يوم فى الشهر
المهم فى خلال 10 ايام كنت مظبط كله وصرفت مصاريف جامدة جدااااااااااااا
والنت اشتغل تماما طول الشهر فصل يومين 2 بس طول الشهر
وانا بلم الاشتراكات لقيت بعضهم بيقولى ايه
بس النت فصل مرتين 
يعنى ساب ال 28 يوم اللى كان شغال فيهم وبص على اليومين
بدل ما يقول ده الحمد لله اتظبط عن الاول كتير بصلك على اليومين
هو ده الزبون
وبيعاملوك على ان فلوس النت حرام تاخدها يعنى مش معايا فلوس دلوقتى استنى لما اقبض المعاش مش عارف ايه وكإن اللى بتصرفه من جيبك وتيجى تلمه منهم حرام فى حرام
تعالوا نشوف نتعامل ازاى مع الناس دى
اول فئة انا عاخد نت ببلاش هو كدا طبعا دول عالم بجحة تقدر تتعامل معاهم بطريقتين 
الاولى تقلب الناس دى خالص متركبلهاش احنا طالع ميتين ام اللى خلفونا عشان كام  لحلوح فى اخر الشهر مياكلوش عيش بلدى حاف
التانية فى ناس مش هتعرف تخلع منهم لاسباب زى مثلا صاحب ابوك زميلة والدتك كلام من ده ساعتها هوبا ارميله 2 جيجا فى جهازه عن طريق اليوزر وريح بالك وموتله سرعته تماما خليها اقل من 256 خليه يفتح جوجل بالعافية صدقتى هيخلع منك ولما يكلمك كل شوية قوله النت عندنا كدا من الشركات وريح بالك
خلصنا من الزبون التنح
نروح للزبون اللى بيدور على ارخص حاجة
ده اتعامل معاه بمبدأ السرعات والكميات ملوش حل غير كدا واللى يقولك انا عاوز نت باشتراك قليل قوله مش عندى فى شبكة نت جنبى هوديك لصاحبها تشترك منه
اه قوله كدا صدقنى لو هو وافق انت الكسبان الزباين المعفنة دى هما اكتر زباين بتعلى البنجات وتفحت الشبكة وتطفش منك الزباين النضيفة اللى بتدفع اشتراكات محترمة علشان تلاقى نت نضيف
ولما يقولك وليه متبقاش انت رخيص زى الشبكة التانية قوله والله انا خدمتى مختلفة وكل واحد بيقدر خدمته وش كدا
نيجى للزبون بقى اللى خلاص هيركب وانت بتتفق معاه هيشترى ايه وكلام من ده
انا هتكلم لو هيركب سلك مثلا
فى زباين يقولك ايه ياعم انا بجيب السلك ب 50 قرش وب 40 قرش كمان 
قوله مفيش مشكلة هجيبلك من النوع ده واجيبلك ابو ربع جنيه كمان بس بشرط السلك بتاعك
يعنى لو اى عطل حصل فيه صيانته بفلوس 
ليه انت هتقوله كدا
لان زى ما وضحتلك النوعية دى من السلوك معفنة اطرافها كلها مش نحاس لو فى طرف قاطع هتنزل السلك كله على الارض وتعلقه تانى وشغلانة وهتغرقه لحامات وببلاش وانت اللى بتصرف على صيانته كمان من جيبك
انما لو نحاس السلك هيستحمل معاك من غير لحامات لغاية لما اربع اطراف كاملين بتقطعوا معاك شوف انت الطرف الواحد بيتقطع كل قد ايه
النهاردة الاخضر اتقطع حط مكانه البنى الابيض برتقالى اتقطع حط بداله ابيض ازرق صدقنى هترتاح كل شوية من اللحامات والشكرتون اللى بتصرفه ونزل السلك وارفعه وكلام من ده
انت متشتغلش غير فى السلوك النضيفة الزبون عاجبه اهلا وسهلا مش عاجبه يبقى صيانة السلك عليه
بالنسبة للى عندهم لابات
اعملهم كام وصلة وليكن 3 وصلات كل وصلة ربع متر كدا واديهم كونكتور هيقفوا عليك تكلفة 3 جنيه تقريبا وبيعهم للزبون ب 10 جنيه
بدل ما كل شوية يقولك السلك بايظ تعالى ارجهولى وببلاش ريح بالك من القصة دى وصدقنى لما هيدفع هيحافظ




سادسا : خدماتك وطور نفسك
يعنى فى ناس بتعمل خدمات صيانة اعملها مرة بفلوس مرة ببلاش صدقنى الزبون هيمسك فيك جدااا حتى لو اشتراكك غالى
خدمات المجلة والقنوات وخلافه لو عملتها مفيش مشكلة اهو تشد الزبون اكتر
معظم البيوت فيها اندرويد دلوقتى مفيش مانع تكلم المشتركين وتجبلهم اكسسات وتدى انت السرعة للاكسس ويعيشوا هما يشغلوه على موبيل على لاب براحتهم سرعتهم وهما حرين فيها
يعنى حسس الزبون انك بتهتم صدقنى هتفرق معاك كتير




شوية حاجات كدا على السريع
قفل شغلك بعناية جداااااا سوتشاتك اللى فى الشارع غطيها بعناية جداااااااااا
السلوك اللى مربوطة على عواميد الكهربا ياريت يكون تحتها اكياس بلاسك عشان متسحش من حر الصيف
لو ناوى تفرد سلوك نضيفة خلى القديمة كهربا كل طرفين نحاس مع طرفين حديد واعمل فيشتين من هنا ومن هنا عشان تضمن ان الكهربا متفصلش
ممكن تعمل نظام الباك اب اللى فى الصورة اللى جاية دية هترتاح جدااااااااااا






دول شوية نصائح حبيت احطها ليستفيد الجميع


hassan zain
وعشان برضه محدش يقول بعمل دعاية




مش هحط لا لنك جروب ولا لنك الصفحة 




الموضوع معمول لوجه الله ليس الا
كل اللى محتاجه بكل استفادة هتستفادوها دعوة بان ربنا يرزقنى حسن الخاتمة وانا ساجد سجدة مخلصة لوجهه الكريم
اللهم امين
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://shar7.arabepro.com
محمود
زائر



مُساهمةموضوع: رد: الخلاصة فى الشبكات   الأربعاء فبراير 18, 2015 10:25 pm

بسم الله ما شاء الله بارك الله فيك
الرجوع الى أعلى الصفحة اذهب الى الأسفل
 
الخلاصة فى الشبكات
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
شرح :: شروحات الشبكات بأنواعها :: شرح المايكروتك وملحقاته-
انتقل الى: